VOV4.Xơ Đăng - Măng lơ 12/10, Khu pơkuâ cheăng Đoân Droh rơtăm kong pơlê Gia Lai tơkŭm po tơdroăng kheăn kơdeăn mâu khu pú hên, ngế krê châ tơƀrê tung hnoăng pêi cheăng Đoân ƀă tơdroăng droh rơtăm phô̆m xông kân hneăng hơnăm 2017 – 2022. A roh leh, Khu pơkuâ cheăng Đoân Droh rơtăm kong pơlê Gia Lai hiăng diâp ƀâng kheăn kơdeăn ăm 27 ngế krê ƀă 28 khu pú hên; Kăn hnê ngăn Vi ƀan kong pơlê Gia Lai diâp ƀâng kheăn kơdeăn ăm 5 khu pú hên ƀă 10 ngế krê, hiăng rơkê tung tơdroăng pêi cheăng Đoân ƀă tơdroăng pêi hnoăng cheăng dêi droh rơtăm phô̆m xông kân sap hơnăm 2017 troh hơnăm 2022.

Mâu kăn ƀô Đoân châ Vi ƀan kong pơlê Gia Lai diâp ƀâng kheăn kơdeăn

Khu xiâm pơkuâ Đoân Droh rơtăm hiăng diâp Kih niê̆m Chương “Xua rơxông hơnăm ối nếo” ăm 23 ngế krê hiăng hên tơdroăng veăng kum, pleăng hnoăng cheăng tung tơdroăng hnê hriâm, hnê mơjiâng, hnê tơ’nôm ăm rơxông hơnăm ối nếo, cho mâu kăn ƀô̆ Đoân dêi kong pơlê Gia Lai.

VOV Tây Nguyên/Tơplôu: A Sa Ly