Xông tơpui hnê mơhno a roh leh, pôa Phạm Anh Tuấn – Phŏ Kăn pơkuâ hnê ngăn cheăng Đảng kong pơlê, Kăn hnê ngăn Vi ƀan kong pơlê Gia Lai kheăn kơdeăn hnoăng dêi khu Kŏng an Gia Lai tung rak gâk kring kal kí, rak tơniăn lâp pơlê pơla tung pơla kố nah. Tơdrêng amê pơkâ tâi tâng khu cheăng pơtối mơnhông hnoăng ki xiâm, tơrŭm krá tơniăn ƀă mâu kơvâ cheăng, đoân theh, khu râ kăn pơkuâ pêi pro châ tơƀrê 5 khu hnoăng cheăng ki xiâm.

Tung mê, tối rơdêi pơkâ ‘nâi tơdroăng ing pơlê pơla, tíu cheăng, tơleăng teăm tơdrêng mâu tơdroăng ki chiâng ai mơngế xôi; tơleăng pơxâu phâk mơngế xôi, ôh tá lôi mơjiâng chiâng tíu ki ôh tá tơniăn nếo; ôh tá lôi tro kơdrâ ôh tá chiâng pro ki klâi, ôh tá ƀĕng ê tung tơdroăng ki nếo. Pôa Phạm Anh Tuấn tối rơdêi:

‘’Tâi tâng khu cheăng kal kí tung kong pơlê mơnhông hiâm mơno hbrâ, tơmiât pêi rơkê, kơtăng, rĕng ƀă pôu râng hnoăng cheăng tung hnoăng cheăng gâk kring tơniăn, rak vế krá tơniăn pơlê, mơjiâng xiâm kối krá tơniăn vâ kum kuăn pơlê rế hía rế lĕm tro tâ. Pơtối mơjiâng ƀă mơdêk châ tơƀrê tơdroăng tâi tâng kuăn pơlê gâk kring tơnêi têa, mơnhông ivá ó rơdêi tâi tâng dêi khu cheăng kal kí tung gâk kring tơniăn, ing mê, chiâng tơdroăng tơ’noăng kơdrâm kơdrĕng phiu ro, pơxúa, châ tơƀrê ăm rêm râ kuăn pơlê’’.

Xông tơpui tơdah hnoăng cheăng, Thiê̆u tươ̆ng Lê Quang Nhân, Kăn pơkuâ Kŏng an kong pơlê Gia Lai tối ăm ‘nâi: roh lăm pơtrui rup roh kố cho tơdroăng pêi pro ki nhên hnê mơhno dêi Tỉnh ủy, Vi ƀan hnê ngăn kong pơlê Gia Lai ƀă Khu xiâm Kŏng an, mơhno tơdroăng khŏm mơ-eăm kal kí tung gâk kring tơdroăng rêh ối tơniăn lĕm dêi kuăn pơlê, rak krá tơniăn pơlê pơla, kum mơnhông cheăng kâ rêh ối pơlê pơla a kong pơlê.

Sap ing kố troh tơdế khế 9, tâi tâng khu cheăng kô tơkŭm pơtrui rup mâu ngế xôi kân ki rơ-iô, mâu ngế xôi ki ai pú hên, ăm liăn xo liăn rơkâ hên, ƀoah kê, ma vtŭi, tong tơmeăm, xôi luât ‘na kong prâi, chiâ xo tơmeăm khoăng tung kơdâm tơnêi ôh tá tro luât ƀă xúa kŏng ngê̆ rơxông nếo vâ pro xôi.

Môi tung mâu tíu ki nếo cho tơdroăng cheăng Kŏng an kong pơlê Gia Lai mơjiâng ƀă pơtroh khu ngế lăm séa ngăn tơvât 151 – ai 2 tôh râ kong pơlê ƀă 135 tôh râ cheăm, tơdjêp séa ngăn rơkê ƀă khu lêng, tơkŭm po séa ngăn kơtăng tung pơlê. Khu cheăng kố kô pơxâu phâk kơtăng mâu tơdroăng pro ôh tá tơniăn pơlê, tơkŭm tơ’noăng rơxế ôh tá tro luât, mâu ngế xôi troăng kơphô̆ ƀă mâu tíu ki tô ‘na gâk kring. Thiê̆u tươ̆ng Lê Quang Nhân mơnhên:

‘’Tâi tâng kăn ƀô̆ mâu lêng khu cheăng pơtối mơdêk hiâm mơno pơtrui rup, tơrŭm môi tuăn, môi tuăn sap apoăng troh tá tui lui, mơ-eăm tơkâ hluâ rêm tơdroăng pá puât, pơloăng mơnúa khŏm mơ-eăm kêi đeăng hnoăng cheăng châ pơcháu, đi đo pâ vế ƀă trâu hơngế tung hiâm mơno ƀă pêi pro khŏm chiâng tơdroăng xua tơnêi têa hiêt dêi châ, xua kuăn pơlê mê pêi kum, inâi kơnâ cho tơdroăng ki krih tơviah kơnía má môi. Tâi tâng khu kŏng an kong pơlê kô đi đo mơ-eăm, mơ-eăm tâi ivá, mơnhông hnoăng cho khu xiâm tung tơdroăng tơniăn gâk kring pơlê pơla, khŏm mơ-eăm kêi đeăng tâi tâng rêm hnoăng cheăng’’.

Klêi kơ’nâi Leh, kơdrâm kăn ƀô̆, mâu lêng hiăng veăng mơđah tơbleăng voh tơchok ƀă khĭ công tơchok, tơdroăng ki mơđah tơbleăng mơhno ivá rơdêi ‘na châ, hiâm mơno ‘răng ƀă hiâm mơno hbrâ tơplâ dêi khu Kŏng an kuăn pơlê. A leh lo lăm pêi cheăng, Kŏng an kong pơlê xuân po prôk pơtăng chât rơxế đăk chŭng rơxông nếo môi tiah rơxế mơdât răng pháu, rơxế kom ƀa tât barrie, rơxế pĕng têa mơdât tơxul tơxal, rơxế tŏng gum, rơxế hnê mơhno tơpâ mơdât on chếo, rơxế pơtâng tối drô troăng kân, rơxế kông tơpâ on chếo, rơxế pơto kuăn kiâ kong pêi cheăng... mơjiâng tơdroăng kơdrâm phiu ro, tơplâ ƀă tŏng xo mơngế hliăng tiâ tung rêm tơdroăng.