Klêi kơ'nâi mâu rôh kong mêi kân, têa kroăng a kông ki vâ mot tung thôn Thanh Sơn, cheăm Čư̆ A Thai hiu hdrok têi. Ngoh Vi Văn Trượt, Kăn pơkuâ hnê ngăn Chi ƀô̆ hlối pro Kăn thôn hiăng teăm ai mâ tơdrêng vâ xup um, klêi mê tơbleăng tung khu Zalo, tối ăm vâi krâ nhŏng o rơnáu, kơchăng drêng prôk lăm athế tơniăn. Kot mâ hơnăm 1995, ngoh hiăng hriâm cử nhân luât ƀă hiăng pêi cheăng a râ cheăm, klêi kơ'nâi 'mot tơkŭm, ngoh Trượt vêh pêi dêi hnoăng cheăng a thôn Thanh Sơn châ 'mot tơkŭm sap ing 3 to thôn ton, ƀă 401 rơpŏng ai dâng 1.760 pơ'leăng mâ mơngế, ki hên cho hdroâng kuăn ngo.

Tơnêi kân rơdâ, pơ’leăng mâ kuăn pơlê kơdrâm pro kăn pơkuâ thôn hơnăm ối nếo athế tăng troăng pêi rĕng tâ la xuân achê kuăn pơlê. Klêi kơ'nâi lối 2 khế xo pêi hnoăng cheăng nếo, ngoh Trượt mơjiâng khu ki tơrŭm tung Zalo tơdjêp lối 200 rơpŏng, rak khu ki tơdjêp zalo mê krê tung khu cheăng kal kí, tơrŭm Fanpage Facebook ƀă tơpui tung loa rơ'jíu vâ pơtroh tơdroăng. Ngoh ối hnê kuăn pơlê xúa pêi VNeID, tơdjêp ƀaoh hiêm pơlê pơla, ƀaoh hiêm khăm pơlât ƀă pêi pro tơdroăng cheăng ƀă kŏng ngê̆. Maluâ tiah mê, drêng ai tơdroăng tơvâ tơvân, ngoh teăm troh tơrêm a rơpŏng hngêi:

“Dế kố, tơdroăng cheăng a thôn gá hên ƀă athế pơklât thế troh tơdrêng vâ 'nâi ki xơpá dêi kuăn pơlê môi tiah lâi mê nếo pêi klêi tơdroăng cheăng; mê athế pơtroh hlá mơ-éa ăm râ kơpêng lơ xo hlá mơ-éa pơklât thế athế a kơmăi tĭnh tâi. Nôkố, á xuân dế xúa vâ hnê kuăn pơlê tơkŭm hlá mơ-éa tung VneID vâ kuăn pơlê châ hlê plĕng ƀă pêi cheăng rế hía rế rơkê hên tâ”.

Klêi kơ'nâi 'mot tơkŭm, thôn D'Rốc, cheăm Chư A Thai ai lối 500 rơpŏng, ƀă 8 hdroâng kuăn ngo rơtế rêh ối. Pôa Nguyễn Công Quân, ngế ki hiăng ton hơnăm pro kăn thôn ƀă kăn mô đô̆i hneăng hdrối nah, pơtối châ kuăn pơlê loi tơngah pơcháu hnoăng cheăng pro kăn thôn nếo. 'Nâi nhên tơrêm kơpong kuăn pơlê rêh ối, mâu tíu ki tơ'lêi tro tơnêi tơhnâp ƀă mâu troăng ki hmâ tro têa lu drêng kong mêi kân, pôa hbrâ séa ngăn, pơtâng tối vâ kuăn pơlê hbrâ ví xía vâ.

“Môi tiah trối Ƀơrô cheăng kâ pơtroh tơdroăng tối tơbleăng 'na hyôh kong prâi mê pin pơtroh tơdrêng hlối, tơbleăng vâ vâi krâ nhŏng o 'nâi nhên tơdroăng. Tung pêi chiâk deăng kô tơ'lêi hlâu drêng pin hiăng 'nâi nhên tơdroăng ki rơhí rơhó. Tâng vâ mơdâ pêt báu mê vâi rĕng mơdâ hlối vâ báu xông kân lơ mơdâ hrá tâ, drêng hiăng ‘nâi nhên mê pin kô chiâng pêi cheăng kâ”.

Ing 23 to thôn ton hdrối nah, cheăm Čư̆ A Thai hiăng xing xoăng ối 13 to thôn, ai 8 ngế kăn pơkuâ thôn ƀă 5 ngế kăn pơkuâ hnê ngăn Chi ƀô̆ xuân cho kăn pơkuâ thôn. Tâi tâng kăn pơkuâ thôn klêi xing xoăng pơrá hiăng hriâm troh trung hok phôh thong tơngi klêng, chiâng xúa kơmăi tĭnh ƀă phôn râng kŏng. Klêi kơ'nâi xing xoăng mơngế pêi cheăng, cheăm pơtối pêi pro tơdroăng hnê tối, tơleăng mơnhên, séa ngăn rơpŏng kơtiê, pơkuâ tơdroăng mơjiâng ƀă rak vế tơniăn tơdroăng rêh ối; tơdrêng amê hlối mơdêk tơrŭm cheăng pơla kăn pơkuâ thôn ƀă chi ủy, Khu pơkuâ Măt trâ̆n, Kŏng an cheăm ƀă mâu khu râ. Pôa Nguyễn Hữu Khóa, Kăn phŏ pơkuâ hnê ngăn Đảng ủy, Kăn phŏ hnê ngăn Vi ƀan cheăm Čư̆ A Thai tối ăm ngin 'nâi, khu kố ối tŏng kum tơdrêng kuăn pơlê vâ vâi krâ-nhŏng o hmâ ƀă túa pơkâ tơleăng tơdroăng cheăng chêh tối tung điê̆n tưh, tung măng internet:

“Mâu kăn ngăn thôn klêi kơ'nâi 'mot tơkŭm hiăng hbrâ rơnáu tí tăng 'nâi plĕng, xúa phôn râng kŏng ƀă mâu khu todjêp Zalo, mâu tơdroăng vâ tí tăng 'nâi plĕng tơdroăng cheăng. Khu kăn pơkuâ thôn xuân kơhnâ tơrŭm ƀă mâu ngế tung tôh xúa cheăng chêh tung điê̆n tưh, măng internet kum kuăn pơlê tơkŭm tơdroăng tung tài khoản VneID, tơdroăng cheăng pêi tiô troăng hyôh troăng tung măng, tơdroăng chêl thiê̆n tiô troăng hyôh măng, tí tăng 'nâi plĕng tơdroăng hriâm tâp ki nếo”.

Tung lâp kong pơlê Gia Lai, kơxô̆ thôn, pơlê, tôh kơphô̆ hiăng kơdroh lối 48% klêi kơ'nâi rah xo, tăng mơngế cheăng ngăn thôn ki rơkê. Dế nôkố kong pơlê ai 1.400 ngế kăn pơkuâ thôn, tôh kơphô̆. Tung mê 183 ngế hlối pro kăn pơkuâ hnê ngăn Chi ƀô̆. Ki rơhêng vâ tối, ai 10 ngế ki hriâm rơkê, ai 1 ngế tiê̆n sih ƀă 9 ngế ki hriâm rơkê kơ'nâi đăi hok ki ê. Pôa Nguyễn Thanh Vũ, Kăn phŏ pơkuâ Khu pơkuâ kăn ƀô̆ kong pơlê ăm 'nâi, kong pơlê dế mơ-eăm rak tơniăn tơdroăng hnê hriâm rơkê, tơdroăng ki loi tơngah ƀă ivá hơ'lêh kơxô̆ dêi khu kăn pơkuâ thôn, tôh kơphô̆ vâ khu kăn pơkuâ thôn, tôh kơphô̆ pêi cheăng tro tiô hnoăng cheăng pơkâ ki nếo:

“Klêi kơ'nâi rah xo, rế hía rế khu ki kố kô châ rak tơniăn tro tâ. Tiô tơdroăng pơkâ thế dêi Khu tơkŭm po hnê ngăn cheăng xiâm tơnêi têa ƀă dêi kong pơlê mê kal tơdroăng ki rơkê plĕng 'na kŏng ngê̆ thông tin dêi vâi athế rĕng khât. Nôkố ƀơrô cheăng điê̆n tưh dêi kong pơlê tơdjêp ƀă thôn, athế rơkê plĕng 'na kŏng ngê̆ thông tin nếo châ mot tung phần mềm kố. Xua mê, tơdroăng pơkâ thế cho vâi athế hlê plĕng 'na pơ'lêh cheăng xúa điê̆n tưh ƀă măng internet”.

Klêi kơ'nâi 'mot tơkŭm, mâu kơpong tơnêi ki kân rơdâ dế pơtroh ăm ngế ki pơkuâ thôn, tôh kơphô̆ hên hnoăng cheăng tâ. Drêng châ tơniăn 'na ivá ƀă hơ'lêh nếo túa pêi cheăng, vâi kô pơtối cho kông tơdjêp ki ôh tá păng lôi pơla khu kăn pơkuâ ƀă kuăn pơlê.