Kơxo lơ 20/6, Vi ƀan kong pơlê Gia Lai tơkŭm po hneăng hôp mơgêi pơtâng tơdroăng cheăng 6 khế apoăng hơnăm, pêi pro hnoăng cheăng 6 khế mơ’nui hơnăm 2023. 6 khế hơnăm 2023, tơdroăng cheăng kâ, rêh ối pơlê pơla dêi kong pơlê ai hên tơtêk. Kơlo tơtêk cheăng kâ dêi kong pơlê tiô tối hdrối châ 5,54%, pêi lo liăn tê tơmeăm khoăng ngi kong têa ê châ 420 rơtuh dollars, lâp kong pơlê ai 490 khu tê mơdró nếo mơjiâng.

Vi ƀan kong pơlê hiăng kĭ môi tuăn troăng hơlâ mơ’no liăn ăm 15 tơdroăng tơkêa bro ƀă tâi tâng kơxô̆ liăn kĭ 1.615 rơtal liăn. Tung la ngiâ, vâ rak tơniăn tơdroăng mơ’no liăn ngân tơnêi têa, Vi ƀan kong pơlê Gia Lai pơkâ thế mâu khu cheăng, kơvâ cheăng, kong pơlê, khu mơ’no liăn cheăng thâ pêi kêi đeăng mâu hlá mơ-éa mơ’no liăn cheăng, pêi pro rĕng tơdroăng tăng tơnêi ƀă vêh xĕn kuăn pơlê vâ ai tơnêi pơcháu ăm khu ki mơjiâng pro kế tơmeăm; mơjiâng troăng pêi, tơdroăng pêi cheăng inhên ăm rêm tơdroăng tơkêa bro. Pro kơtăng tơdroăng kheăn hôu, pơxâu phâk mâu ngế pro xôi, mơdât pro hrá tơdroăng pơcháu kơxô̆ liăn, mơ’no liăn cheăng.