VOV4.Xơ Đăng - Luâ tơdế hơnăm 2022, kơxô̆ liăn mung vâ ‘no mơjiâng tơmeăm khoăng ăm tơnêi têa a kong pơlê Gia Lai nếo châ vâ chê 23%, iâ tâ kơlo ki tơdế tung lâp tơnêi  ai 27%. Tung mê,  hên tơdroăng tơkêa bro ki kal dêi kong pơlê chiâng hrá pêi pro thế ‘mâi hơ’lêh kơlo ‘no liăn cheăng klêi kơ’nâi tơdjâk rôh tơnêi to kơnâ ƀă rôh tơmeăm mơjiâng hngêi trăng to kơnâ.

Sap mơ’nui hơnăm 2021, Khu pơkuâ Mơ’no liăn mơjiâng tơmeăm a tơring Chư Păh (Gia Lai) hiăng pêi kêi đeăng tâi tâng mâu mơ-éa mơ’no liăn mơjiâng tơmeăm ăm 4 troăng kân tơdjêp mâu cheăm kơpong hơngế hơngo, kơpong vâ pêi pro sap ing apoăng hơnăm 2022. Laga, drêng mot hneăng mơjiâng pro mê yă tơmeăm khoăng tâk. Pơtối mê, xơmong, meăm thĕp, hmốu, têa châu diezel, chhá kơxu pro troăng kân pơrá tâk sap ing 10 troh 20%, thăm nếo tâk châ tơdế yă hiăng châ kĭ apoăng.

Tơdroăng kố pro tơring thế pơtê mâu tơdroăng tơkêa bro vâ tơkôm mâu kơvâ dêi kong pơlê hnê mơhno. Pôa Đặng Thái Huy – Kăn pơkuâ mâu tơdroăng tơkêa bro mơ’no liăn mơjiâng tơmeăm a tơring Chư Păh tối ăm ‘nâi:

‘’Tung tâi tâng kơxô̆ 100 rơtal liăn mê, tơkâ hluâ kơlo mơ’no dâng 10 rơtal liăn. Drêng mê, tơring pro mơ-éa tơbleăng Vi ƀan kong pơlê cho pâ tơpui hnê tối. Nôkố, kĭ ăm pêi pro cho 4 troăng kân, nôkố tơring rah 2 troăng kân kĭ ăm pêi pro hdrối. Mơ’nui dêi hneăng mơjiâng pro, yă têa châu tâng kơdroh mê kĭ ăm pêi pro pơtối pêi tơdâng. Tâng xuân ối hluâ mê thế pơkâ kong pơlê pơ’lêh troăng hơlâ’’.

Tơdroăng tơkêa bro troăng kân cheăm dêi tơring Čư̆ Păh hrá xua yă tơmeăm khoăng mơjiâng tâk

Rơtế ƀă tơdroăng yă tơmeăm khoăng mơjiâng pro tơmeăm to kơnâ, mê tơdroăng yă tơnêi tơníu to kơnâ pơla kố nah pro tơdroăng tăng tơnêi trâm pá, hên tơdroăng tơkêa bro ki xiâm a Gia Lai kô tơ’lêi hrá kêi đeăng tiô pơkâ. Ki má lối cho Tơdroăng tơkêa bro Troăng kân drô a tơring Čư̆ Sê – Čư̆ Pưh – Čư̆ Prông xŏn 33 km, tâi tâng kơxô̆ liăn mơjiâng pro 320 rơtal liăn. Tơdroăng tơkêa bro pơxiâm mơjiâng pro sap khế 3/2021, troh nôkố, tơdroăng toh tơnêi hmốu, ăm rơxế kơtâk mơdiê ăm krá a hên kơpong troăng hiăng kêi đeăng. Krê kơpong hluâ mâu kơpong kuăn pơlê rêh ối a pơlê kân Nhơn Hòa, tơring Čư̆ Pưh, pá tơdroăng tăng tơnêi xua kuăn pơlê ôh tá môi tuăn.

Pôa Phạm Xuân Điệp – Kăn pơkuâ tơdroăng tơkêa bro mơ’no liăn mơjiâng pro tơmeăm kong pơlê Gia Lai – khu ki pơkuâ mơ’no liăn pro, tối ăm ‘nâi:

“Nôkố, u ối lối 2km xuân tá hâi ai troăng tăng tơnêi dêi tơring. Vi ƀan kong pơlê ƀă mâu tíu cheăng, kơ koan ki tơdjâk hiăng hnê mơhno thăm pêi pro rĕng tơdroăng tăng tơnêi. Ngin tiô tối hdrối khế 9 mê tơdroăng chiâ, tôh tơnêi hmốu, ăm rơxế tiê ăm i krá, mâu tíu ai kong mê cho hiăng kêi đeăng. Mơgêi rơnó mêi, mâu khu mơjiâng pro kô ăm rơxế ok hmốu tôh têa kơxu tiê ăm i lĕm’’.

Tiô Khu pơkâ túa cheăng ƀă mơ’no liăn cheăng kong pơlê Gia Lai, hơnăm 2022 cho hơnăm pêi pro hên tơdroăng tơkêa bro pơxiâm mơjiâng pro nếo dêi hneăng mơ’no liăn cheăng iâ khế 2021 – 2025. Ƀă mâu tơdroăng tơkêa bro pơxiâm pro nếo, mơdon hên chôu vâ po rơdâ pêi pro mâu mơ-éa séa ngăn, mơjiâng pro, mơnhên kĭ ăm pêi pro, há yă pro ƀă hía hé, thế troh mơ’nui hơnăm nếo pơxiâm mơjiâng pro tơmeăm, xua mê mâu khế apoăng hơnăm mơ’no liăn pro iâ.

Yă têa châu, tơmeăm mơjiâng pro troăng, yă tơmeăm to kơnâ ôh tá ‘nâi tối hdrối hiăng pro pá kân ăm mâu khu tơdah mơjiâng pro, ki rơhêng vâ tối cho mâu tơdroăng tơkêa bro kĭ tơkêa tiô troăng ai pơkâ yă nhên, pơxiâm pro a mâu hơnăm 2020, 2021.

Tơdroăng tơkêa bro troăng tơring Čư̆ Sê – Čư̆ Pưh – Čư̆ Prông hên kơpong hiăng ok hmốu tôh chhá kơxu ăm rơxế tiê i lĕm

Ki nhên, hơnăm 2022, kong pơlê Gia Lai ai tâi tâng 27 tơdroăng tơkêa bro mơ’no liăn cheăng, ƀă tâi tâng kơxô̆ liăn lối 3.600 rơtal liăn. Riân troh lơ 19/7/2022, kong pơlê nếo mơ’no liăn châ vâ chê 993 rơtal liăn, tơdâng 22,88% (iâ tâ kơlo tơdâng lâp tơnêi têa cho lối 27%). Pôa Nguyễn Hữu Quế - Kăn pơkuâ Khu pơkuâ túa cheăng ƀă mơ’no liăn cheăng kong pơlê Gia Lai tối ăm ‘nâi, nôkố ai 2 tơdroăng tơkêa bro ki xiâm pá tăng tơnêi, 11 tơdroăng tơkêa bro tá hâi kêi đeăng mâu mơ-éa mơ’no liăn cheăng.

Mâu tơdroăng tơkêa bro ki tơdjâk troh yă tơmeăm mơjiâng pro tơmeăm ôh tá tơniăn, mâu khu mơ’no liăn mơjiâng pro thế pâ pơ’lêh kơxô̆ liăn. Kong pơlê hiăng mơjiâng 4 tôh pêi cheăng đi đo séa ngăn, mơhnhôk mâu kong pơlê, tíu cheăng, pơkâ thế troăng pêi teăm tơdrêng tah lôi mâu tơdroăng pá puât tơvâ tơvân tung mơ’no liăn cheăng tơnêi.

Tiô pôa Nguyễn Hữu Quế, nôkố mâu tơdroăng tơvâ tơvân tung mơ’no liăn , nôkố mâu tơdroăng pá puât hiăng châ tŏng kum:

‘’Mâu tơdroăng ki tơdjâk pa kong apoăng hơnăm 2022, mơni kô ôh tá ai xếo, pơtih yă mâu tơmeăm khoăng hiăng kơdroh, tơnêi to kơnâ yă ôh tá ai xếo; mâu tơmeăm ki tro tơvâ mâu pơkâ hiăng châ mâu kơvâ cheăng tơbleăng ăm pêi pro. Tiah mê, sap ing kố troh mơ’nui hơnăm, tơdroăng pêi pro mơ’no liăn cheăng mơjiâng tơmeăm ƀă mơ’no liăn cheăng tơnêi têa, mâu tơdroăng ki xiâm cho ing khu mơ’no liăn cheăng ƀă mâu khu pơkuâ tơdroăng tơkêa bro.

Ngin khŏm tơbleăng ăm Vi ƀan kong pơlê tơdroăng mơ’no liăn cheăng mơjiâng tơmeăm tung kong pơlê Gia Lai tơxâng pơkâ, châ mâu tơdroăng vâ pêi troh hiăng pơkâ mơ’no’’.

Xuân tiô Khu pơkâ túa cheăng ƀă mơ’no liăn cheăng kong pơlê Gia Lai, kong pơlê nôkố ai mâu tơdroăng tơkêa bro ki xiâm môi tiah: Tơdroăng tơkêa bro troăng kân tơkăng kong thâ mơjiâng pro a tơring Đức Cơ, kong pơlê Gia Lai (pơxiâm mơjiâng pro khế 12/2020, tiô tối hdrối kêi đeăng khế 11/2022); tơdroăng tơkêa bro Troăng lăm a tơring Čư̆ Sê – Čư̆ Pưh – Čư̆ Prông, kong pơlê Gia Lai (pơxiâm pro khế 3/2021, tiô tối hdrối kêi đeăng khế 12/2022; Tơdroăng tơkêa bro mơjiâng pro tơ’nôm, rơnêu troăng kong pơlê 663 (pơxiâm pro khế 12/2021, tiô tối hdrối kêi đeăng khế 11/2023); Tơdroăng tơkêa bro mơjiâng pro tơ’nôm, rơnêu troăng kong pơlê 664 (pơxiâm mơjiâng pro khế 12/2021, tiô tối hdrối kêi đeăng khế 11/2023).

VOV Tây Nguyên chêh

A Sa Ly tơplôu ƀă tơbleăng