Kơnôm mâu khu tê mơdró a kong pơlê hbrâ, rĕng teăm ƀă kơchơ mơdró tê ngi kong têa ê tơmeăm klêi kơ’nâi COVID-19, 10 khế hiăng hluâ, pêi lo liăn tê ngi kong têa ê tơmeăm dêi kong pơlê Gia Lai hiăng châ 595 rơtuh dollars. Tung mê, mâu tơmeăm pêi lo ing chiâk deăng châ vâ chê 74%. Krê kơphế châ hên má môi ƀă 435 rơtuh dollars. Tiô jâ Đào Thị Thu Nguyệt – Kăn phŏ pơkuâ Khu pơkuâ kơmăi kơmok tê mơdró kong pơlê Gia Lai, hơnăm 2022, tơdroăng cheăng kâ lâp plâi tơnêi ai tơdroăng ki ôh tá tơniăn ƀă mâu tơmeăm khoăng tê ngi kong têa ê dêi kong pơlê, ki má lối tơdroăng kơdroh xúa tơmeăm, mơdêk yă pơto tơmeăm ƀă tơdroăng ki pêt mơjiâng, tê ngi kong têa Sinuâ tro kơdroh hên.

Kơphế châ kơxô̆ liăn 435 rơtuh dollars ăm kong pơlê Gia Lai ing tơdroăng tê ngi kong têa ê

Laga, kơnôm ƀeăn ƀĕng ƀă rế hía pêi cheăng rế rơkê, mâu khu tê mơdró tê ngi kong têa ê mâu tơmeăm a kong pơlê hiăng teăm rĕng ƀă kơchơ mơdró, hên tơmeăm hiăng châ pơ’lêh ing tê ngi kong têa ê tiô troăng tiêuh ngăch chiâng troăng chĭnh ngăch ƀă hía hé, kum kân tung tơdroăng châ tơƀrê tơdjuôm. Tiô tối hdrối, mơgêi hơnăm kố, tê ngi kong têa ê tơmeăm dêi kong pơlê Gia Lai kô tơkâ a kơlo 660 rơtuh dollars.