VOV4.Xơ Đăng - Vi ƀan hnê ngăn kong pơlê Gia Lai nếo tơkŭm po hneăng hôp séa mơnhên ngăn hnoăng cheăng 9 khế, pơkâ pêi pro hnoăng cheăng 3 khế mơ’nui hơnăm. Kăn hnê ngăn Vi ƀan kong pơlê Gia Lai hiăng pơkâ thế mâu ngế cheăng tung Vi ƀan hnê ngăn kong pơlê, mâu khu râ kơvâ cheăng, mâu kơ koan, tơring, cheăm rơtế môi tuăn, khŏm mơ-eăm, pêi pro kơtăng ó tâ nếo tung hnê mơhno, djâ troăng, pêi tâi ivá mơno, pêi tơrŭm, veăng kum dêi pó tung pơla pêi pro adrêng mâu hnoăng cheăng, troăng hơlâ vâ pêi pro klêi mâu hnoăng cheăng, kơlo, hnoăng mơnhông pêi cheăng kâ-rêh ối pơlê pơla, kring vế tơniăn cheăng lêng hơnăm 2022.

Tơpui a roh hôp mê, pôa Nguyễn Hữu Quế, Kăn pơkuâ ngăn ‘na pơkâ ƀă mơ’no liăn cheăng Gia Lai tối ăm ‘nâi: Gia Lai cho môi tung mâu kong pơlê ki rĕng ăm mung liăn ƀă ai tơdroăng mơjiâng tơmeăm khoăng tơdjuôm ối iâ. Tung mê, Khu pơkuâ ngăn tơdroăng tơkêa bro mơ’no liăn cheăng mơjiâng kế tơmeăm kong pơlê ƀă mâu khu râ, kơvâ cheăng cho mâu khu ki pơkuâ xiâm mâu tơdroăng tơkêa bro ki kal, ai kơxô̆ liăn ki hên, la liăn ki ăm mung ối hrá, ối iâ.

Vâ pơtih tơdroăng tơkêa bro mơjiâng kơpong cheăng kâ peăng mâ hâi lo (kơlo liăn ki mơ’no pêi 1 rơpâu 200 rơtal liăn) dế nôkố nếo chêh bro klêi hồ sơ, pơxiâm vâ tăng khu ngế mơjiâng pro tơmeăm khoăng; tơdroăng tơkêa bro troăng prôk Phù Đổng, pơlê kong kơdrâm Plei Ku athế vêh séa ngăn nếo hồ sơ. Pakĭng mê, tơdroăng ki mâu tơring, cheăm pêi pro hrá ‘na tơdroăng tơrŭm xo tơvêh tơnêi tíu xuân ai tơdjâk troh pêi pro mâu tơdroăng tơkêa bro.

Pôa Nguyễn Hữu Quế, Kăn pơkâ mơ’no liăn pêi mâu tơdroăng cheăng kong pơlê Gia Lai hiăng tối nhên ki xiâm dêi tơdroăng tơkêa bro troăng Nguyễn Chí Thanh, pơlê kong kơdrâm Plei Ku ƀă troăng tơkoh pơla tơring Čư̆ Sê ƀă Čư̆ Pưh- Čư̆ Prông (troăng tơkâ luâ tơring Čư̆ Pưh).

‘’Troăng Nguyễn Chí Thanh, pơlê kong kơdrâm Plei Ku tá hâi teăm pơcháu híu môi met ki lâi ôh vâ Khu pơkuâ tơdroăng tơkêa bro pơkâ. Khu pơkuâ dế pơkuâ ngăn tơdroăng ki mơjiâng pro a mâu troăng ki ối tơvâ tơvân. Lơ môi tiah a tơring Čư̆ Pưh, á cho ngế ki xiâm pro pơkuâ chu lăm ngăn, mơhnhôk thế tơring xo mơdrếo 1 km 3 a pơlê kân Nhơn Hòa. Kăn hnê ngăn Vi ƀan tơring Čư̆ Pưh nếo kĭ tơkêa tâk tăm pŏng chêl thiăn ăm 50 rơpŏng, ối 34 rơpŏng pơcháu ăm ngin vâ pro troăng kân tơnêi têa kơxô̆ 14, la troh nôkố vâi xuân tá hâi teăm pơcháu’’.

Pôa Trương Hải Long – Kăn hnê ngăn Vi ƀan kong pơlê Gia Lai tơpui

Tiô pôa Nguyễn Hữu Quế, ki xiâm dêi tơdroăng ăm mung liăn hrá mê cho hnoăng cheăng ki hbrâ ối hrá, ối tơvâ hên mâu hlá mơ-éa ki chêh bro, tơdroăng ki chêl thiê̆n, xo mơdrếo tơnêi tíu. Maluâ ti mê, ƀă ki hên tơdroăng tơkêa bro ki pơxiâm pêi pro tung khế 9 mê tơdroăng ăm mung liăn kô pêi pro rĕng.

La ngiâ kố ah, mâu kăn ki pơkuâ mơ’no liăn cheăng athế pơtối hnê mơhnhôk mâu khu mơjiâng pro vâ rĕng pêi pro klêi mâu tơdroăng pơkâ dêi luât ‘na mơ’no liăn cheăng mơjiâng ki xiâm vâ rak vế tơdroăng ki tơniăn drêng mơ’no liăn ăm mung vâ mơjiâng pro tơmeăm khoăng tơdjuôm.

Pơkâ hdrối mê hía nah, Khu ngăn ‘na pơkâ mơ’no liăn cheăng hiăng tối tơbleăng ƀă Vi ƀan hnê ngăn kong pơlê Gia Lai mơ’no hên hlá mơ-éa hnê tối ăm khu ki mơ’no liăn cheăng vâ thăm mơdêk tơdroăng rĕng ăm mung liăn ngân ƀă mơjiâng 4 khu ki cheăng tơkŭm, tí tăng séa ngăn, hnê mơhnhôk, tah lôi mâu tơdroăng ki xahpá, tơvâ tơvân vâ thăm mơdêk rĕng tơdroăng ăm mung liăn mơ’no mơjiâng tơmeăm khoăng tơdjuôm hơnăm 2022.

Troh nôkố, tơdroăng ki ăm mung liăn mơjiâng tơmeăm khoăng dêi kong pơlê châ 31%, vâ chê kơlo ki tơdế riân ngăn tơdjuôm dêi tâi tơnêi têa.

‘Na châ xo liăn ngân, mê nôkố tâi tâng kơxô̆ liăn ki châ xo kong pơlê ai 4 rơpâu 100 rơtal liăn, kơdroh 30,7% tâng vâ pơchông ngăn rơnó kố dêi hơnăm nah. Pôa Nguyễn Anh Dũng, Kăn rak ngăn liăn dêi kong pơlê Gia Lai tối ăm ‘nâi, ki xiâm cho kong pơlê dế trâm pá puât tung pơla xo liăn ƀă kuăn pơlê ki xúa tơnêi, ƀă hên tơdroăng tơkêa bro ki ê. Pôa Dũng hiăng pâ thế mâu troăng hơlâ thăm mơdêk pêi lo liăn ngân a mâu khế mơ’no tung hơnăm:

‘’Ngin hiăng pâ thế Vi ƀan hnê ngăn kong pơlê tơkŭm hnê mơhno mâu khu râ, kơvâ cheăng tơkŭm séa mơnhên ngăn mâu tơdroăng tơkêa bro mơ’no liăn cheăng ki ai xúa tơnêi, vâ pêi pro klêi mâu hlá mơ-éa bă hnối tơ’mot khu ki mơ’no liăn cheăng mơjiâng tơmeăm, hnối rế vâ pơtối mơdêk ivá cheăng, rế vâ châ liăn ngân.

Ki xiâm má péa, ngin ai tơrŭm cheăng ƀă Khu ngăn ‘na xo hnoăng mơhá, séa mơnhên ngăn mâu tơdroăng ki châ xo liăn ngân tung pơla 3 khế mơ’nui hơnăm vâ khŏm châ rak tơniăn tơdroăng pêi lo liăn ngân hơnăm 2022’’.

Gia Lai dế pêi pro hrá tơdroăng cheăng

Pakĭng mê, mâu tơdroăng ki mơ’no liăn mơjiâng pro tơmeăm tơdjuôm ƀă châ xo liăn, roh hôp dêi Vi ƀan hnê ngăn kong pơlê Gia Lai xuân hiăng tơpui tối hên mâu tơdroăng ki kal athế pêi pro, môi tiah ‘mâi rơnêu túa ki mơ’no liăn cheăng, pơreăng a mâu hdrê loăng ƀă kơpôu ro, tơdroăng ki ‘mâi mơhông pêi cheăng kâ mơ’no tê kế tơmeăm pêi lo ing chiâk deăng ƀă hên hĕng mâu tơdroăng ki ê.

Xông tơpui hnê tối a roh hôp mê, pôa Trương Hải Long, Kăn hnê ngăn Vi ƀan kong pơlê Gia Lai hiăng pơkâ thế mâu khu râ, mâu kơvâ cheăng tung kong pơlê tơrŭm, pơkâ pêi pro tơdrêng mâu troăng hơlâ, vâ pêi pro klêi mâu hnoăng cheăng, kơlo cheăng ki vâ pêi pro ‘na pêi cheăng kâ-rêh ối pơlê pơla hơnăm 2022 dêi kong pơlê:

“Tơkŭm pơkâ pêi pro mâu tơdroăng cheăng ối hrá tâng vâ pơchông ngăn ƀă  tơdroăng pơkâ ƀă mâu tơdroăng pơkâ vâ tah lôi mâu ki tơpá, u ối tơvâ tơvân tung kơvâ cheăng; xo liăn, tơdroăng ăm mung liăn vâ mơjiâng tơmeăm khoăng ối hrá, mâu tơdroăng tơkêa bro, tơdroăng ‘mâi mơnhông pêi cheăng kâ-rêh ối pơlê pơla; kơvâ khăm pơlât, pơkeăng, tơdroăng pơkâ ‘na xúa tơnêi tíu a mâu pơlê cheăm; tơdroăng pêi cheăng kâ, tê mơdró kâ, pơreăng, oâ hdrong a mâu hdrê loăng, mâu mơnăn mơnôa; tơdroăng ki ai khu ngế pro xôi luât.

Mâu kăn dêi mâu khu râ, kơvâ cheăng, kăn hnê ngăn Vi ƀan tơring, pơlê krâm athế thâ rĕng pêi pro mâu hnoăng cheăng ki mâu kăn phŏ hnê ngăn Vi ƀan kong pơlê hiăng hnê tối’’.

Kăn xiâm hnê ngăn Vi ƀan kong pơlê Gia Lai xuân hiăng pâ thế mâu khu râ, kơvâ cheăng dêi Vi ƀan kong pơlê, mâu khu râ, kơvâ cheăng, tơring, pơlê kong krâm, pơlê cheăm rơtế tơrŭm, khŏm mơ-eăm, pêi pro kơhnâ khât tâ nếo, khŏm mơ-eăm, tơrŭm, veăng kum dêi pó tung pơkâ pêi pro adrêng mâu hnoăng cheăng, túa cheăng vâ pêi pro klêi mâu tơdroăng cheăng, hnoăng cheăng xiâm tung mơnhông pêi cheăng kâ – rêh ối pơlê pơla, kring vế tơniăn ‘na pơlê pơla, tơnêi têa, gak ngăn tơniăn lĕm tung hơnăm 2022.

                                                                                                VOV Tây Nguyên

Nhat Lisa tơplôu ƀă tơbleăng