VOV4.Xơ Đăng - Kơxê lơ 30/8, Kŏng an kong pơlê Gia Lai tơkŭm po Leh tơbleăng Pơkâ dêi Khu xiâm ngăn Kŏng an pôk Trung tă Ksor H’Bơ Khắp pro kăn phŏ pơkuâ Kŏng an kong pơlê Gia Lai. Jâ H’Bơ Khắp xuân ngế kơdrâi pro kăn phŏ pơkuâ mơngế Jarai ki apoăng dêi kơvâ kŏng an Gia Lai. A rôh leh, Pôa Rah Lan Lâm, kăn pơkuâ Kŏng an kong pơlê Gia Lai ăm ‘nâi, Trung tă Ksor H’Bơ Khắp kot mâ hơnăm 1982, a cheăm Ia Trok, tơring Ia Pa, kong pơlê Gia Lai, hriâm klêi thak sih chuyên ngành séa ngăn tơdroăng xôi.

Gia Lai tơbleăng Pơkâ pôk Trung tă Ksor H’Bơ Khắp pro kăn phŏ pơkuâ Kŏng an kong pơlê

Trung tă Ksor H’Bơ Khắp hiăng tơkâ luâ 16 hơnăm pêi hên tơdroăng cheăng a pơlê kong krâm Ayun Pa môi tiah: pro phŏ Đô̆i trưởng, kăn phŏ ngăn Kŏng an, kăn pơkuâ Kŏng an; cho kăn pơkuâ ai tơdroăng hriâm, ivá cheăng rơkê tung tơdroăng cheăng, mơdêk tơdroăng ki hâk vâ tung pơkuâ.

Trung tă Ksor H’Bơ Khắp cho ngế kơdrâi pro kăn phŏ pơkuâ ki apoăng dêi Kŏng an kong pơlê Gia Lai. Xo hnoăng cheăng, jâ ăm ‘nâi, kô pơtối mơdêk hiâm mơno lĕm dêi mơngế kŏng an kuăn pơlê, ôh tá la lâi pơtê hriâm ƀối, hriâm tâp mâu tơdroăng ki rơkê plĕng vâ pêi klêi hnoăng cheăng châ pơcháu.

Katarina Nga tơplôu ƀă tơbleăng