Tung pơla achê kố, kong pơlê Gia Lai đi đo ai mâu roh klâk têa châi hiâm ‘nâng, ngế ki klâk têa ki hên a rơxông hơnăm hok tro. Apoăng hơnăm troh nôkố, lâp kong pơlê Gia Lai ai 23 roh klâk têa pro 31 ngế vâi hdrêng hlâ, tâk hên tâng pơchông ƀă roh kố hơnăm nah.

Tiô Khu pơkuâ cheăng pêi Mô đô̆i rong ƀă rêh ối pơlê pơla kong pơlê Gia Lai tối, tơdroăng klâk têa dế tâk cho xua tơdroăng hlê plĕng dêi rơpŏng, kơdrâm mơngế, pơlê pơla ‘na ki tơ’lêi klâk têa a vâi hdrêng ối iâ; vâi hdrêng ôh tá châ rak ngăn krâu lĕm ing nôu pâ; vâi hdrêng tá hâi chiâng klê têa, ôh tá chiâng pro ti lâi drêng klêh tung têa, ôh tá ai tíu xah hêi ăm vâi hdrêng, ki má lối cho kơpong  hơngế hơngo, kơpong thôn pơlê.

Tiô pôa Võ Như Minh Quang, Kăn pơkuâ Ƀơrô gâk ngăn, rak vế vâi hdrêng ƀă Tơdâng tơ’mô pơla kơdrâi ƀă kơnốu – Khu pơkuâ cheăng pêi Mô đô̆i rong râ ƀă Rêh ối pơlê pơla kong pơlê Gia Lai, rơtế ƀă tơdroăng thăm pêi pro rơdêi tơdroăng hnê klê têa ăm vâi hdrêng, rêm rơpŏng xuân kal pơkuâ tơdroăng xah hêi dêi vâi hdrêng, ki má lối cho tung roh pơtê hriâm.