Kơxê hâi lơ 7/7, a kong pơlê Gia Lai, Khu tơkŭm po tơdroăng pêi pro pleăng mơheăm dêi Tíu xiâm tơkŭm po leh pơxiâm mơhnhôk pleăng mơheăm rôh má 8. Tiô khu hnê mơhnhôk pleăng mơheăm kong pơlê Gia Lai, sap apoăng hơnăm troh nôkố, lâp tung kong pơlê hiăng tơkŭm po 45 rôh pleăng mơheăm, pơtối châ xo 9 rơpâu CC mơheăm, châ 57% tiô pơkâ xua Khu hnê mơhno dêi Tơnêi têa  ‘na mơhnhôk pleăng mơheăm.

Tung tơdroăng pleăng mơheăm rôh kố, Khu tơkŭm pleăng mơheăm ối pơkâ châ ki iâ 600 CC mơheăm vâ ai mơheăm ‘măn tŏng kum pơlât tơdrêng ăm mâu ngế ki kal vâ mơheăm ƀă pơlât a rơnó mơdrăng. Rôh kố, Kăn xiâm hnê ngăn Vi ƀan kong pơlê Gia Lai diâp ƀâng kơdeăn khĕn ăm 5 khu pú hên, 7 ngế hiăng hên rôh pleăng mơheăm tung hơnăm 2022-2023. Khu hnê mơhnhôk pleăng mơheăm kong pơlê diâp ăm hlá mơ-éa kơdeăn khĕn ăm 12 khu pú hên, 8 rơpŏng, 28 ngế ki hiăng ai hnoăng veăng pleăng mơheăm.