VOV4.Xơ Đăng - Kơxê lơ 12/8, Hâi mơdĭng Tâi tâng kuăn pơlê rak vế gâk kring Tơnêi têa hơnăm 2022 châ kong pơlê Gia Lai tơkŭm po a 2 tơring Čư̆ Pah prếi Phú Thiện. Sap ing apoăng hơnăm troh nôkố, a kong pơlê Gia Lai, tơdroăng ki pro xôi hiăng chu kơdroh hên tá kơxô̆ ngế pro xôi ƀă kơxô̆ ngế hlâ ƀă kơxô̆ ngế tro rong. Tung mê, kơxô̆ ngế ki tăng mâu ngế pro xôi gá hên, malối ki rơ-iêo châ 93,5%.

Kăn pơkuâ kŏng an kong pơlê Gia Lai diâp hlá mơéa khê̆n kơdeăn mâu ngế krê ki kơhnâ rơkê tung tơdroăng tơ’noăng a tơring Čư̆ Pah

Hnoăng cheăng mơjiâng tơdroăng tơ’noăng tâi tâng kuăn pơlê rak vế gâk kring Tơnêi têa ôh tá la lâi pơtê hơ’lêh nếo ‘na tơdroăng ki kal ƀă tơdroăng ki pơkâ, tơ’mot hên kuăn pơlê veăng. La ngiâ ah, lâp kong pơlê ai 550 tôh kơphô̆, thôn, pơlê, hngêi trung hriâ, kơ koan, khu mơdró kâ ƀă lối 50.450 ngế veăng tung tơdroăng kố, veăng kum kal khât rơtế ƀă mâu khu lêng tơplâ, hbrâ mơdât mâu ngế pro xôi; rak vế gâk kring tơniăn. Tung la ngiâ ah, Khu hnê mơhno Hbrâ mơdât mâu ngế pro xôi ƀă Mơjiâng tơdroăng Tâi tâng kuăn pơlê rak vế gâk kring Tơnêi têa kong pơlê Gia Lai rơhêng vâ mâu tíu pêi cheăng, tơring, cheăm pơtối mơjiâng tro tơdroăng a mâu pơlê, cheăm, hnê tối mơhnhôk kuăn pơlê kơhnâ veăng hbrâ mơdât, tơplâ pro mâu tơdroăng ki ôh tá chiâng ƀă mâu ngế ki tơchê̆ng tơmiât pro ‘mêi dêi mâu khu vâ pro tơklâ tơnêi têa, tơplâ mơdât mâu ngế pro xôi, mơdêk tơrŭm tâi tâng kuăn pơlê.

Katarina Nga tơplôu ƀă tơbleăng