A roh hôp Mơhnhôk mơ’no liăn cheăng kâ hơnăm 2026, kong pơlê Gia Lai hiăng pơcháu tơdroăng pơkâ mơ’no liăn ngân ƀă kĭ tơkêa tơdroăng chôu vế ăm tâi tâng 273 tơdroăng tơkêa bro, ƀă tâi tâng kơxô̆ liăn ki kĭ tơkêa ahdrối, tiô tối ahdrối kô tâk troh 850.000 rơtal liăn (tơ’mô ƀă lối 33 rơtal dollars). Tung mê, ai 144 tơdroăng tơkêa bro pơkâ mơhnhôk thế mơ’no tâi tâng kơxô̆ liăn lối 230.000 rơtal liăn ƀă 129 tơdroăng tơkêa bro kĭ tơkêa hlá mơ-éa chôu vế ai lối 620.000 rơtal liăn. Hên Grup cheăng kâ ki kân hiăng kĭ tơhrâ tơdroăng tơkêa bro châ rơpâu rơtal liăn, trối: VinEnergo (vêh xúa hyôh kong prâi vâ cheăng kâ- ai 210.000 rơtal liăn)...

Teăng mâ ăm mâu khu mơdró kâ dế pơkâ thế pêi pro hên tơdroăng tơkêa bro ki kân a kong pơlê kố, pôa Trần Bá Dương, Kăn hnê ngăn Hô̆i đong Kuan trĭ, Kăn xiâm pơkuâ Grup Thaco, hiăng ai tối mơnhên a roh hôp kố:

“A kong pơlê Gia Lai, tung plâ 7 hơnăm hdrối mê hía nah, tơdroăng cheăng hnê tối, rak vế ’na luât hiăng tro pơtê lôi, klêi kơ’nâi tơmot mâu kong pơlê Gia Lai tơdroăng hnê tối ƀă rak vế ‘na luât hiăng châ pêi pro trâu rơdâ tâ, lêi tah lôi mâu tơdroăng ki ối tơvâ tơvân ƀă thăm mơdêk hnoăng cheăng ki kố tâk a’ngêi tâ, ai pơxúa tâ. Mâu tơdroăng tơkêa bro ki mê hiăng châ pơkâ pêi pro ƀă cho tơdroăng ki kal má môi, mê cho tơdroăng rơtế kơhnâ khât dêi khu râ kăn hnê ngăn rêm râ dêi kong pơlê Gia Lai trối mâu khế hơnăm pơla hdrối kố nah, mê ngin tơkêa kô rak vế, pêi pro rĕng ƀă châ tơƀrê mâu tơdroăng tơkêa bro, veăng gum mơjiâng chiâng môi túa pêi chiâk deăng krá tơniăn ton a kong pơlê Gia Lai”.

Mâu tơdroăng ki kal mê a roh hôp cho ki xiâm ƀă ivá ó rơdêi vâ Gia Lai châ prôk a’ngêi tâ, ing mê, khŏm pêi pro péa to kơxô̆ ing hơnăm 2026. Vâ pơkâ pêi pro mâu tơdroăng ki tơkêa mê, pôa Thái Đại Ngọc, Kăn pơkuâ hnê ngăn Đảng ủi kong pơlê Gia Lai hiăng pơkâ thế mâu khu râ, kơvâ cheăng athế rak vế, pêi pro hnoăng cheăng tro tiô tơdroăng “6 nhên”: nhên mơngế, nhên tơdroăng cheăng, nhên chôu phut, nhên hnoăng cheăng, nhên tơdroăng ki tơƀrê ƀă nhên hnoăng pơkuâ ngăn, ôh tá khoh ăm mâu tơdroăng tơkêa bro mê bu chêh tối to a hlá mơ-éa; Tơkêa kô mơjiâng môi tơdroăng cheăng ki tơveăng gum pêi pro mâu kơtâ hlá mơ-éa ki ngăn ‘na kuăn pơlê, tơdroăng ki “ƀlêi chiâng dêi khu mơdró kâ cho tơdroăng ki vâ mơnhông dêi kong pơlê” ƀă ing mê, kô tơkêa pro tiô tơdroăng ki tơleăng mơnhên tŭm tơdroăng ki pro xahpá ăm khu ngế ki mơ’no liăn cheăng; tơdrêng amê, pói rơhêng vâ mâu khu mơdró kâ ôh tá xê to pơkâ pêi pro tiô tơdroăng tơkêa bro tro tiô tơdroăng mê ối cho tơdroăng ki vâ tơdjêp ton xŏn, koh mơnê khôi túa, vêa vong dêi mâu hdrông kuăn ngo ƀă hnối thăm mơdêk tơdroăng ki tơdjêp pơla mâu khu mơdró kâ tung kong pơlê vâ veăng rơtế pêi pro trâu rơdâ tung mâu tơdroăng cheăng ki pêi pro tung lâp plâi tơnêi.

Ing mâu tơdroăng pơkâ pêi pro a roh hôp mê, pôa Thái Đại Ngọc, Kăn pơkuâ hnê ngăn Đảng ủi kong pơlê Gia Lai hiăng vêh mơnhên tối tơdroăng ki kodo mơ-eăm pơhlêh mâu tơdroăng tơkêa bro mơ’no liăn cheăng vâ pêi pro mâu tơdroăng tơkêa bro ki nhên, ing mê, veăng pêi pro châ tơƀrê tơdroăng cheăng ki mơnhông pêi cheăng kâ-rêh ối pơlê pơla dêi tơnêi têa.

“Gia Lai tơkêa kô rơtế prôk, pêi pro, tŏng gum tơrêm tơdroăng cheăng lĕm to má môi vâ mâu khu mơdró, mâu ngế ki ai liăn tŏng gum, pêi chiâk pêi deăng, tê mơdró kâ, rơtế mơnhông ƀă rơtế pêi pro ƀlêi chiâng. Ngin pói rơhêng vâ ƀă loi tơngah tiah kố, Gia Lai kô ôh tá xê to tíu ki troh vâ ôm hyô ngăn, tê mơdró kâ, pêi cheăng tơniăn, ki păng ‘nâng cho tíu ki tơdjêp mâu tơdroăng ki vâ pêi pro tiô tơdroăng tơkêa bro, tuăn i hiâm tơmiât ki vâ mơ’no liăn ngân pêi kâ chiâng châ pơxúa kân khât păng ‘nâng, vâ mâu khu ki ai liăn ngân mơ’no liăn cheăng chiâng mâu khu mơdró kâ ki djâ troăng pêi pro ahdrối tung kơvâ pêi hnoăng cheăng tơná”.

Veăng ai mâ ƀă pơkuâ ngăn roh hôp mê, pôa Hồ Quốc Dũng, Phŏ Ngế pro xiâm hnê ngăn tơnêi têa vêh séa mơnhên ƀă kơdeăn khĕn hôm khât hnoăng ki kơdo mơ-eăm dêi kong pơlê Gia Lai; ki tơbrê dêi roh hôp mê hiăng ăm hlo tuăn loi dêi pơlê pơla ƀă mâu khu ngế ki mơ’no liăn cheăng vâ mơnhông hnoăng cheăng ki mơnhông dêi kong pơlê. Ngế pro xiâm phŏ hnê ngăn tơnêi têa hiăng pơkâ thế kong pơlê veăng krếo tơdjâ mâu khu mơdró kâ ki ê veăng mơ’no liăn cheăng kâ tro tiô luât “3 ôh” (ôh tá xo tơnêi tíu, kong kế vâ tăng liăn, ôh tá xo tơdroăng tơkêa bro vâ xúa mơngế pê cheăng ki ôh tá tro luât kŏng ngê̆ ton ki ôh pá tơtro xếo, ôh tá rah xo mâu ngế ki mơ’no liăn cheăng la cheăng ôh tá rơkê) ƀă kơjo gum mâu tơdroăng tơkêa bro FDI dêi rêm rơxông trối AI, tê kế tơmeăm.

Tơdrêng amê, Ngế pro xiâm phŏ hnê ngăn pâ thế kong pơlê Gia Lai athế ngăn nhên tơdroăng pêi cheăng kâ, tê mơdró kâ cho ivá ki kân ó rơdêi má môi, thăm mơdêk tơdroăng ki chêh bro hlá mơ-eá tro tiô tơdroăng “hlê plĕng, tơveăng gum” vâ ing mê, mơhno tuăn mơno hâk vâ dêi khu mơdró kâ pro troăng hơlâ ki mơnhên ƀă tơkêa kô đi đo rơtế prôk tơdrêng, lêi tah lôi mâu tơdroăng ki xahpá ăm khu mơ’no liăn cheăng kâ.

“Hnê pơkâ mâu tơdroăng ki nhên trâu rơdâ tiô hiâm mơno ki mơnhông pêi cheăng kâ dêi khu ngế krê chiâng môi tung mâu hnoăng cheăng ki kal má môi dêi tơdroăng pêi cheăng kâ. Ing mê, tŏng gum tơ’lêi hlâu vâ khu mơdró kâ krê châ mơnhông ‘na túa cheăng, ‘na ivá cheăng; mơhnhôk thế mâu khu râ, kơvâ cheăng ai ivá ki ó rơdêi vâ khoh kâi châ tơƀrê tê mơdró kâ, tơdrêng amê, hnối thăm mơdêk tơrŭm cheăng pơla khu mơdró kâ tung tơnêi têa ƀă khu mơdró kâ FDI, chôa ‘lâng mơnhông mot tung tơdroăng ki pêi pro adrêng tung khu cheăng ki ai tơdjâk troh ki kơnía dêi cheăng kâ ƀă pêi mơjiâng kế tơmeăm tung lâp plâi tơnêi. Pin athế tối nhên, athế pêi pro khât, pro tá troh tui lui, pêi troh tơdroăng ki ai pơxúa kân khât vâ mơnhông Gia Lai pin châ mơnhông krá tơniăn tung la ngiâ”.

Ƀă mâu tơdroăng tơkêa bro ó rơdêi ing khu kăn hnê ngăn rơtế ai tuăn loi tơngah khât ƀă tơdroăng ki rơtế prôk, rơtế pêi pro dêi khu mơdró kâ, Roh hôp mơhnhôk mơ’no liăn cheăng kâ hơnăm 2026 ôh tá xê to ‘na mâu tơdroăng ki vâ pêi lo liăn ngân ki kal khât ăm Gia Lai, mê ối po hneăng ki pói tơngah ‘na môi tơdroăng ki mơnhông krá rơdêi, tơniăn ton. Ing troăng hơlâ ki mê, Gia Lai dế chôa ‘lâng mơnhông vâ mơnhên hnoăng cheăng dêi tơná, cho tíu ki troh, kal khât dêi tơdroăng pro pơhêng vâ mơ’no kơxô̆ liăn cheăng kâ, vâ la ngiâ kô khŏm châ pêi pro lo hên liăn ngân rĕng, châ pơxúa, tơƀrê ƀă tơrŭm trâu rơdâ tung tơdroăng ki kal tung lâp plâi tơnêi tung la ngiâ.