Ƀă inâi “Gia Lai – Kong ngo kân rơdâ lo troh a têa kơxĭ”, Hơnăm Ôm hyô tơnêi têa 2026 djâ tơvế tơdroăng ki kal ‘na tơdjêp pơla tơnêi tơníu kong ngo ki kân rơdâ dêi Tây Nguyên ƀă lo troh a kơpong têa kơxĭ kong tơbăng, pơla kong kế ki chiâng xêh krip tơdrŏm ƀă ai hên túa lĕm tro ki hơniâp ro dêi mâu hdroâng kuăn ngo.

Kố cho rôh vâ Gia Lai tơbleăng tối ƀă lâp plâi tơnêi mâu tơdroăng ki kơnía git ‘na túa lĕm tro kong kế nhâ loăng ki chiâng xêh ƀă kuăn mơngế ki têm rơpiât dêi kơpong tơnêi Tây Nguyên. Tung hơnăm 2026 tiô tối kô ai 244 tơdroăng châ tơkŭm po ‘na túa lĕm tro, ôm hyô ƀă tơ’noăng ivá a Gia Lai ƀă châ tơkŭm po a hên kong pơlê ki ê tung lâp tơnêi têa.

Tơdroăng ki xiâm cho Pơxiâm po Hơnăm Ôm hyô tơnêi têa – Gia Lai 2026, tiô tối hdrối kô po a kong măng hâi lơ 28/3 a bêng Quy Nhơn. Tung măng tĭng tơkŭm po, kong pơlê Gia Lai kô po Rôh hôp pơkâ mơdêk ‘no liăn cheăng hơnăm 2026, tiô tối hdrối kô diâp pơkâ troăng hơlâ ‘no liăn pêi cheăng ƀă kĭ mâu tơdroăng tơkêa tơrŭm cheăng ăm hên tơdroăng tơkêa bro ối tung mâu kơvâ cheăng ƀă kơmăi kơmok, on tơhrik, troăng klông, tê mơdró ƀă ôm hyô.

Pakĭng mê, ối ai hên tơdroăng pêi pro ăm tơmối mơnúa ngăn môi tiah: Tơdroăng ki mơđah tơbleăng kơphế tro ƀă ôm hyô pêi chiâk deăng; tơbleăng tối tơdroăng ki lĕm dêi mâu kế kâ, têa ôu dêi kong pơlê; mâu rôh tơ’noăng ivá rơtế ƀă hên tơdroăng cheăng pêi pro túa lĕm tro ki hơniâp ro.