Gia Lai ai troăng kơxái on tơhrik 500kV ƀă 220kV xŏn vâ chê 800 km, tơkâ hên kơpong chiâk deăng kơpong vâi krâ hdroâng kuăn ngo. Kơnôm đi đo châ pơtâng tối ‘na rak tơniăn troăng on tơhrik xua mê vâi krâ kuăn pơlê hlê plĕng hnoăng cheăng nhên, tơdjuôm ivá rơtế kơvâ on tơhrik gak kring loăng trăng ƀă kơxái on tơhrik.

Ngoh Rmah Chơn, pơlê Breng 2, cheăm Ia Dêr, tơring Ia Grai, kong pơlê Gia Lai ai 2 ha kơphế achê troăng kơxái on tơhrik 500kV tối ăm ‘nâi:

‘’Á ai chiâk deăng pá kơdâm troăng kơxái on tơhrik, á ƀă rơpŏng á đi đo pêi tiô mâu pơkâ kring vế tơniăn troăng ƀă troăng kơxái on tơhrik. Ing mê, á ƀă rơpŏng á xuân pơtâng tối ăm vâi krâ kuăn pơlê tung pơlê ôh tá pêi pro tơdroăng tong, mâu rơpŏng ai chiâk deăng kơphế, loăng plâi pá kơdâm troăng kơxái on tơhrik mê thế đi đo pêi pro mâu pơkâ ‘na rak tơniăn troăng kơxái on tơhrik’’.

Peăng Khu pơkuâ troăng kơxái on tơhrik Gia Lai, tíu đi đo séa ngăn tơniăn lâp troăng, mơ’no liăn rôe tơƀai kơneăng UAV vâ mơdêk châ tơƀrê séa ngăn, mơgrúa troăng kơxái ƀă tá pêi ‘na kŏng ƀă kŏng ngê̆ Hotline vâ kơdroh chôu tơpâ on tơhrik. Ki rơhêng vâ tối cho mâu kơmăi klâ xoăng on tơhrik, kŏng nhân viên ƀă mơngế pêi cheăng  dêi tíu cheăng.

Ngoh Trần Văn Trang, Ngế pơkuâ gak pêi cheăng ki xiâm dêi kơmăi klâ xoăng on tơhrik 500kV Plei Ku 2, mơ’no on tơhrik Gia Lai, tối:

‘’A rơnó kố mơ’no on tơhrik a mâu troăng kơxái on tơhrik ƀiê̆n ăp cho hên, cho lối 80 troh 90% xua mê nhŏng o ki gak pêi cheăng tơmâng hên troh tơdroăng kố thế séa ngăn kơtăng. Drêng mơ’no hên mê tơ’lêi tơdjâk troh mâu troăng kơxái kơmăi kơmok, kô pro chiâng tô tơmeăm ƀă chiâng ai tơdroăng ki ôh tá tơniăn tung tơdroăng mơ’no on tơhrik.

Nôkố a kơmăi tĭnh pơrá hlo tŭm tâi tâng, ngế gâk pêi cheăng kô séa ngăn ing kơmăi tĭnh ƀă séa ngăn tâi tâng tơdroăng pêi cheăng dêi kơmăi kơmok. Tâi tâng tơdroăng klâi pơrá pơtroh a kơmăi tĭnh xua mê tơdroăng mơ’no kô châ séa ngăn rĕng tâ, séa ngăn châ hlo rĕng tâ’’.

Tiô pôa Trần Khánh Trung,Kăn phŏ pơkuâ ‘na troăng kơxái on tơhrik Gia Lai, rơtế ƀă 783 km troăng kơxái on tơhrik 220 kV ƀă 500 kV, tíu cheăng ối pôu râng hnoăng pơkuâ 2 hngêi kơmăi klâ xoăng on tơhrik 500kV, 1 toăng hngêi kơmăi klâ xoăng on tơhrik 220 kV. Tíu cheăng hiăng djâ troăng ahdrối xúa kih thuât kơxô̆, mơ’no liăn rôe kơmăi kơmok rơxông nếo tung pơkuâ, mơ’no. Ing mê, kơdroh kơxô̆ liăn mơ’no cheăng mơdêk pêi lo liăn tung pêi cheăng.

‘’Tung hơnăm 2022, kŏng ti mơ’no on tơhrik 3 cho tíu pêi cheăng apoăng tung tâi tâng kŏng ti hiăng tơkŭm châ tơbrê xúa tơƀai kơneăng UAV tung tơdroăng pơkuâ mơ’no on tơhrik. Tơdroăng hriăn plĕng mơjiâng kơmăi pơkuâ kơmăi klâ xoăng on tơhrik ƀă kơmăi ki rơkê vâ kơdroh tung tơdroăng pêi cheăng ăm mơngế pêi cheăng.

Mâu tơdroăng tơkêa bro kố drêng xúa tung pêt mơjiâng tơmeăm hiăng pơ’lêh troăng pêt mơjiâng tơmeăm ƀă kŏng pơ’lêh xúa kŏng ngê̆ thông tin mơjiâng tơdroăng ki châ tơbrê ăm tơdroăng pơ’lêh pêi cheăng xúa kơmăi kơmok hneăng hơnăm 2021 – 2025 dêi Kŏng ti xiâm mơ’no tơhrik Tơnêi têa tối tơdjuôm ƀă dêi Kŏng ti mơ’no tơhrik 3 tối krê’’.