VOV4.Xơ Đăng - Kơxo lơ 27/7, a pơlê kong kơdrâm Plei Ku, Viƀan kong pơlê Gia Lai tơkŭm po Hneăng hôp trâm mâ mơngế ai hnoăng ƀă kăch măng kơhnâ rơkê klăng leh tơbâ 75 hơnăm hâi Mô đô̆i rong râ hlâ hía roh tơplâ xâ nah. Veăng roh trâm mâ roh kố ai 75 ngế kăn teăng mâ, ai 2 ngế Nôu Việt Nam khên tơnôu, 1 ngế ngoh khên tơnôu khu lêng rơtế mâu mô đô̆i rong râ, nhŏng o mô ai mô đô̆i hlâ tung tơplâ xâ teăng mâ ăm lối 12 rơpâu ngế châ tŏng kum liăn kơjo mơngế ai hnoăng ƀă tơnêi têa a Gia Lai.

Viƀan kong pơlê Gia Lai diâp Ƀâng kheăn kơdeăn ăm mơngế ai hnoăng hơnăm 2022

A roh trâm mâ, mâu kăn teăng mâ hiăng rơtế dêi pó tơbâ khôi túa lĕm khên tơnôu dêi hdroâng mơngế ing mâu roh tơplâ xâ. Khu râ kăn pơkuâ kong pơlê Gia Lai hiăng mơhno hiâm mơno pâ mơnê ƀă mơnê păng ‘nâng troh mâu rơpŏng ai hnoăng tơnêi têa, mơngế ai hnoăng kăch măng.

Sap hơnăm 2017 troh nôkố, Gia Lai hiăng tŏng kum rơnêu mơjiâng nếo lối 2.000 toăng hngêi ăm mơngế ai hnoăng tơnêi têa ối pá puât, ƀă lối 73 rơtal liăn. Tơkŭm rak ngăn ăm lối 20 rơpâu roh ngế ai hnoăng ƀă kơxô̆ liăn 22 rơtal liăn. Ai 14 ngế Nôu Việt Nam khên tơnôu ối rêh châ mơjiâng pro ăm hngêi tuăn pâ ƀă châ mâu kơ koan, tíu cheăng tơdah rak ngăn tro tá ah ƀă hía hé.

A Sa Ly tơplôu ƀă tơbleăng