Ƀă ivá khŏm mơ-eăm rak tơniăn a kơphô̆, sap ing hâi lơ 1/2/2026 troh nôkố, khu Kăn sat gak tơniăn troăng kơphô̆, cheăng tung Kŏng an kong pơlê Gia Lai hiăng pơtroh lối 13.500 ngế kăn ƀô̆, lêng tơkŭm lăm pơtrui, séa ngăn. Ing mê châ hlo, pơxâu phâk lối 100 ngế pro xôi, ‘nhiê tah 5 tíu ki po kơchơ hmanag to lo vâ. Tiô Trung tă Nguyễn Ngọc Sơn, Phŏ Đô̆i trưởng Đô̆i Kăn sat tơniăn, Ƀơrô cheăng Kăn sat Pơkuâ ngăn hlá mơ-éa ‘na rak tơniăn pơlê pơla, Kŏng an kong pơlê Gia Lai, rơtế ƀă pơxâu phâk tơdroăng pro xôi, cheăng hnê tối xuân châ mơdêk rơdêi ƀă vâ chê 1 rơpâu rôh hnê tối tơdrêng a mâu kơpong tíu ối tơdjuôm; lối 10.400 rơpŏng tê mơdró hiăng kĭ tơhrâ veăng rak vế tơniăn tíu ối tơdjuôm, tơniăn kơphô̆.

Trung tă Nguyễn Ngọc Sơn tối ăm ‘nâi, khu kố kô pơtối thăm lăm séa ngăn, pơxâu phâk, vâ rak tơniăn ăm Hơnăm ôm hyô Tơnêi têa châ tơkŭm po tơniăn.