VOV4.Xơ Đăng - Hâi lơ 22/8, rơtế ƀă hên kong pơlê, pơlê kong ki ê tung lâp tơnêi têa, hok tro lâm 1 a kong pơlê Gia Lai hiăng troh hngêi trung. Péa măng tĭng hriâm hdrối hâi vâ mot hơnăm hriâm nếo kum ăm mâu vâi o ‘mâi mơnhông dêi mâu tơdroăng ki hlê plĕng ƀă hbrâ rơnáu tơ’nôm mâu tơdroăng vâ loi tơngah mot tung hơnăm hriâm nếo.

Hok tro lâm 1, hngêi trung râ má môi Nguyễn Trãi, cheăm Ia Pêč, tơring Ia Grai tung hâi ki lăm troh a hngêi trung

Hơnăm hriâm 2022 – 2023, lâp kong pơlê Gia Lai ai 209 to hngêi trung Râ má môi, tung mê ai 1.200 to lâm 1, ƀă vâ chê 35 rơpâu ngế hok tro. Hdrối mê, Khu ngăn hnê hriâm ƀă hnê mơjiâng tuăn ngoâ rơkê hiăng ai hlá mơ-éa pơkâ thế mâu Ƀơrô ngăn hnê hriâm pơkâ thế mâu tíu ki hnê hriâm râ má môi ối tung hnoăng pơkuâ rak ngăn hbrâ rơnáu tro mâu tơdroăng ki vâ tơdah hok tro lâm 1 troh hngêi trung rĕng tâ lối 2 măng tĭng tâng pơchông ƀă hâi pơxiâm mot hơnăm hriâm nếo, kum mâu vâi o rĕng hmâ ƀă tơdroăng pơkâ dêi hngêi trung râ má môi xuân môi tiah tơdroăng ki xúa hlá mơéa chêh, kế tơmeăm xúa tung hriâm tâp.

Katarina Nga tơplôu ƀă tơbleăng