VOV4.Xơ Đăng - Kơxo lơ 6/10 pơlê kong kân Hà Nội tơkŭm pơxiâm po tơdroăng tơkêa bro troăng tung kơdâm tơnêi a kơpong troăng pakĭng pơlê kong kân 2,5 – Giải Phóng (pơlê kân Hoàng Mai). Troăng kân tung kơdâm tơnêi tâi tâng kơxô̆ liăn kĭ pro 780 rơtal liăn ing liăn ngân pơlê kong kân Hà Nội. Tơdroăng tơkêa bro troăng tung kơdâm tơnêi a kơpong troăng kân pa kĭng pơlê kong kân 2,5 – Giải Phóng ai troăng rơxế kơtâu, xŏn dâng 460 met, tung mê, peăng kơdâm tơnêi xŏn 140 met ƀă troăng tung kơdâm laga trâ bâ xŏn 320 met. Tíu apoăng dêi troăng tung kơdâm tơnêi tơdjêp ƀă troăng kân pakĭng pơlê kong kân 2,5 kơpong Đầm Hồng – Troăng kân tơnêi têa 1A.

Troăng tung kơdâm tơnêi pakĭng pơlê kong kân 2,5 – Giải Phóng ai kơlo liăn mơ’no vâ chê 800 rơtal liăn

Xông tơpui a leh pơxiâm pro, pôa Trần Sỹ Thanh, Kăn hnê ngăn Vi ƀan pơlê kong kân Hà Nội tối rơdêi, Tơdroăng tơkêa pro mơjiâng troăng kân tung kơdâm tơnêi Troăng kân pakĭng pơlê kong kân 2,5  ƀă troăng Giải Phóng châ mơnhên cho tơmeăm ki xiâm dêi pơlê kong kân hneăng hơnăm 2021 – 2025; xiâm kối cho kơdroh chôm drô troăng kân ƀă chôa ‘lâng kêi đeăng troăng klông pơlê kong xiâm tiô pơkâ hiăng châ Ngế pro xiâm hnê ngăn Chin phuh kĭ. Xua mê, tơdroăng mơjiâng tơdroăng kân cho kal khât ƀă thâ.

VOV/Tơplôu: A Sa Ly