VOV.Xơ Đăng - Hneăng hôp má 4, Kuô̆k hô̆i hneăng má 15 kô hôp tơkŭm tung 21 hâi pêi cheăng, pơxiâm po a kơxo hâi lơ 20/10 ƀă mơgêi a kơxê lơ 15/11. Kố cho tơdroăng ki châ Ƀơrô cheăng Kuô̆k hô̆i ăm ‘nâi a rôh hôp tơbleăng kơxê 17/10. A hneăng hôp kố, Kuô̆k hô̆i kô tơbleăng 7 kơxop hlá mơ-éa Luât, 3 kơxop hlá mơéa Pơkâ. Kuô̆k hô̆i xuân ăm rơkong tơpui tối ‘na 7 kơxop hlá mơéa Luât, tung mê ki rơhêng vâ tối cho kơxop hlá mơ-éa Luât Tơnêi tơníu ki ‘mâi hơ’lêh.

Séa ngăn mâu hlá mơ-éa tối tơbleăng ‘na: mơnhên tối klêi kơ’nâi pêi pro túa pơkâ mơnhông cheăng kâ rêh ối, pơlê pơla, liăn ngân tơnêi têa, túa pơkâ ‘no liăn cheăng tơdjuôm liăn ngân tơnêi têa. Kuô̆k hô̆i séa ngăn tơdroăng ‘Tơdroăng pêi pro troăng hơlâ, luât ‘na pêi pro kơdĭng, mơhrê liăn ngân pơla hơnăm 2016 – 2021.

Tơdjâk troh tơdroăng ‘na têa châu, têa kơxăng tung pơla kố nah pro hên kuăn pơlê hêng hôu, pôa Nguyễn Minh Sơn, kăn phŏ pơkuâ Vi ƀan cheăng kâ dêi Kuô̆k hô̆i tối nhên tơdroăng Chin phuh kal hnê mơhno vâ mâu kơ koan ki ai tơdjâk mơjiâng mâu tơdroăng pơkâ yă tê ‘ngré tơtro tâ, rế rak tơniăn pơxúa ăm kuăn pơlê, khu mơdró kâ xuân môi tiah pơxúa dêi mâu ngế tê mơdró tê roê ngi kong têa ê ƀă tíu pêi cheăng ki tê ‘ngré têa châu têa kơxăng.

VOV/Katarina Nga tơplôu