VOV4.Xơ Đăng -  Hâi lơ 30/8, Khu pơkuâ Đoân Droh rơtăm Dak Lak tơkŭm po tơdroăng Hâi leh mơdĭng “Á nhuô̆m pâ tơnêi têa á”hơnăm 2022 ƀă hên tơdroăng pêi ki má môi. Hâi leh “Á pâ nhuô̆m tơnêi têa á” a Dak Lak hơnăm kố ai hên tơdroăng pêi môi tiah Leh mitting, koh hlá cơ ƀă rơtế tơkŭm po a Plông kân 10/3 (pơlê kong kơdrâm Ƀuôn Ma Thuột), mơđah tơbleăng hơdruê xuâng ƀă tơ’noăng kơtâu troăng hơhngế ‘’Mobirun – Á pâ nhuô̆m tơnêi têa á’’, hneăng hôp tơpui tơno tơdroăng pói vâ hdroh rơtăm.

Leh koh hlá cơ

Tơ’noăng pơtâng tối tơdroăng hơdruê kăch măng, droh rơtăm hơdruê, rơngêi ting ting ƀă xah kế xah hdroâng kuăn ngo; Leh tơbâ 66 hơnăm hâi mơjiâng Khu pơkuâ droh rơtăm Việt Nam ƀă kheăn kơdeăn droh rơtăm ki kơhnâ rơkê tung mâu kơvâ cheăng. Tơdroăng kố va koh phiu ro châ tơƀrê hneăng hôp khu râ kăn mâu râ la ngiâ Hneăng hôp Khu râ kăn lâp tơnêi têa roh má 12, koh phiu ro Hâi mơjiâng tơnêi têa lơ 2/9 ƀă mâu hâi leh kân dêi tơnêi têa.

Lối 1.500 ngế droh rơtăm pơtăng pro um ‘’Á nhuô̆m pâ Việt Nam’’ a leh koh hlá cơ

Rêm tơdroăng pêi cheăng pơrá ai mâu tơdroăng xiâm ki nhên, ing mê mơhnhôk mâu đoân viên droh rơtăm veăng, pêi pro tá hiâm mơno, pro châ tơƀrê rŭm môi tuăn tơkŭm droh rơtăm a mâu tíu cheăng, khu tung kong pơlê.