VOV4.Xơ Đăng - A hneăng hôp má 16, dêi Vi ƀan pơkuâ cheăng Kuô̆k hô̆i  ăm hnê tối tơdroăng hbrâ roh hôp má 4 dêi Kuô̆k hô̆i. Vi ƀan pơkuâ cheăng Kuô̆k hô̆i môi tuăn rôh hôp má 4, Kuô̆k hô̆i hneăng 15 kô po a hâi lơ 20/10 ƀă kô mơgêi a kơxê lơ 15/11. Tâi tâng chôu hôp ai 21 hâi tung tơdroăng hôp tơpui vâ rơhéa tơƀrê má môi, la ‘nâi kơdĭng chôu tơpui ƀă hôp tơkŭm tâi hneăng a Hngêi Kuô̆k hô̆i. 

Ngế chêh tôm xo rơkong, Ngế pơkuâ Ƀơrô Kuô̆k hô̆i, pôa Bùi Văn Cường ăm ‘nâi: tiô tối hdrối Kuô̆k hô̆i mơhno xoăng kơ-êng tiâ tung péa hâi tơdế, ing kơxê hâi lơ 3 troh lơ 5/11 ƀă pơxiâm ‘na tơdroăng mơngế cheăng dêi mơngế ing rôh apoăng hôp. Kuô̆k hô̆i xuân ‘măn 2 hâi tơdế ăm tơdroăng hôp tơpui tơno a Hngêi hôp kân ‘na tơdroăng hôp a hngêi hôp kân tơpui ‘na cheăng kâ, rêh ối ƀă liăn ngân.

Pôa Vương Đình Huệ, Kăn xiâm hnê ngăn Kuô̆k hô̆i ăm ‘nâi: Hneăng hôp tơpui ‘na tơdroăng cheăng kâ - rêh ối ƀă ‘na luât tơnêi ‘mâi hơ’lêh kô krếo mâu kăn dêi 63 to kong pơlê, pơlêkong kân veăng hôp, tơmâng tơpui ƀă klâ pro 2 rôh.  Vi ƀan pơkuâ cheăng Kuô̆k hô̆i pâ thế pôi tơngôu, thế pêi nhên tơdroăng hbrâ mơdât pơreăng, rak tơniăn ăm rôh hôp má 4, Kuô̆k hô̆i hneăng 15.

VOV/Tơplôu: Gương