Hâi lơ 21/12, xua pôa Vương Đình Huệ, Kăn xiâm hnê ngăn Kuô̆k hô̆i pơkuâ hneăng hôp, Vi ƀan pơkuâ cheăng Kuô̆k hô̆i hôp séa ngăn tơdroăng cheăng hbrâ ƀă ăm hnê tối tơdroăng kal, tơdroăng dêi rôh hôp ôh tá xê tiah hmâ rôh má 2, Kuô̆k hô̆i hneăng 15.

Ing mê, tiô tối hdrối, rôh hôp ôh tá xê tiah hmâ, Kuô̆k hô̆i pêi cheăng tung 4 hâi, pơxiâm po a hâi lơ 5/1/2023. A rôh hôp ôh tá xê tiah hmâ roh má 2, tơpui tối tơdroăng kal cho Kuô̆k hô̆i ăm hnê tối, pơkâ Hdró tơdroăng cheăng pêi tâi tâng dêi tơnêi têa pơla hơnăm 2021-2030, mâu tơdroăng vâ pêi troh hơnăm 2050; séa ngăn tơbleăng tơdroăng chêh pro Luât Khăm, pơlât (ki ‘mâi hơ’lêh) ƀă tối mơgêi, tối nhên tơdroăng pêi pro tiô Pơkâ kơxô̆ 30 ‘na Rôh hôp má môi, Kuô̆k hô̆i hneăng 15; séa ngăn, pơkâ tơdroăng pơtối pêi mâu luât pơkâ ki tơdjâk troh tơdroăng cheăng hbrâ mơdât pơreăng COVID - 19. Pakĭng mê séa ngăn, pơkâ mâu tơdroăng ‘na liăn tơnêi têa ƀă ‘na mơngế pêi cheăng.