Kơhnâ, đi đo tâi hiâm mơno kum mâu kơtiê cho tơdroăng châ hlo dêi hên vâi krâ nhŏng o a Ƀuôn Kram, cheăm Ea Tiêu, tơring Čư̆ Kuiñ, kong pơlê Dak Lak tối ‘na jâ H’Bliăk Niê (Amĭ Bơ̆ng). Cho kăn phŏ hnê ngăn Vi ƀan tơring Čư̆ Kuin hdrối nah, drêng pơtê cheăng. Jâ H’Bliăk Niê châ kuăn pơlê pôk pro ngế ki châ kuăn pơlê loi nhuô̆m dêi Ƀuôn Kram. Jâ kơhnâ tung tơdroăng ki pro pơlĕm a cheăm pơlê, kum pro tơrŭm krá pơlê cheăm.

Jâ H’Bliăk Niê tối:

“Á hmâ prôk rơtế mâu kăn pơkuâ thôn mơhnhôk vâi krâ nhŏng o kơhnâ pêi chiâk deăng mơnhông cheăng kâ. ‘Nâi túa rak ngăn loăng kơxu, kơphế, păn ro, păn chu vâ ai liăn, păn roăng kuăn cháu hriâm tâp troh tui lui. Tiah mê, tung la ngiâ nếo ai tơdroăng cheăng tơniăn. Má péa, á veăng kum ivá rơtế ƀă cheăm, thôn pơlê hnê pơchân vâi krâ nhŏng o rak vế khôi túa lĕm tro hdroâng kuăn ngo tơná môi tiah tŏn chêng, mâu tơdroăng mơdĭng dêi hdroâng kuăn ngo tơná vêh mơnhông vâ kuăn ‘nĕng ‘nâi khôi túa lĕm tro dêi hdroâng kuăn ngo tơná”.

Troh nôkố, cheăm Ea Tiêu hiăng pêi klêi thôn pơlê nếo. pêi lo liăn rêm ngế hơnăm 2022 vâ chê 45 rơtuh liăn. Hngêi trăng, troăng klông châ bro lĕm, troăng prôk tung thôn hiăng châ ok ƀê tong. Lâp cheăm ai 14 toăng hngêi mơdrah a thôn ƀă 7 toăng hngêi hôp a pơlê. Châ tơdroăng kố, rơtế ƀă rêm râ khu kăn pơkuâ, kơvâ cheăng sap ing tơring troh cheăm, ai tơdroăng ki veăng kum dêi jâ H’Bliăk Niê đi đo pêi pro tro hnoăng cheăng hnê tối vâ kuăn pơlê hlê châ tơdroăng ki rơhêng vâ, ai pơxúa, ki kal dêi tơdroăng mơjiâng thôn pơlê nếo.

Laga, tơdroăng jâ H’Bliăk Niê ối tơmiât hên cho khôi túa lĕm tro dế rế hía rế vâ hía lôi.

“Á hlo ai mâu tơdroăng ki xơpá môi tiah, tơdroăng rêh ối nôkố phá tơ-ê ƀă nah, nôkố, tơdroăng rêh ối hiăng mơnhông mơdêk, la hên ngế piu lôi khôi túa lĕm tro dêi mâu rơxông jâ pôa nah. Pakĭng tơdroăng ki mơ-eăm pêi cheăng kâ tá hâi krá tơniăn, xuân ối ai mâu ngế ki nâ ối tơkôm tung tơdroăng ki tŏng kum sap ing tơnêi têa. Á mơ-eăm mơhnhôk vâi krâ nhŏng o vâ vâi krâ nhŏng o pin kơhnâ pêi cheăng, pôi tá tơkôm a tơnêi têa tŏng kum, tơkôm ing tơdroăng tŏng kum dêi mâu ngế ki ê’’.

Cho ngế ki rơkê ‘na luât, rơkê tung hnoăng cheăng pơlê pơla hên hơnăm, drêng vêh dêi a pơlê, jâ H’Bliăk Niê đi đo hnê pơchân vâi krâ nhŏng o đi đo pêi pro tiô troăng hơlâ pơkâ dêi Đảng, tơnêi têa. Jâ đi đo hnê pơchân vâi krâ nhŏng o pôi tá hmâng mâu khu ‘mêi pơlông djâ, mơhnhôk bro mâu tơdroăng ôh tá tro, athế tơrŭm, pâ nhuô̆m dêi rơpó xut tah hrâ mơnguâ, kơtiê xơpá.

“Á rơhêng vâ pơlê pin ai tơdroăng ki mơnhông mơdêk, hluăn ing kơtiê, mơ-eăm tung rêh ối, kuăn ‘nĕng hriâm tâp tá troh tui lui. Mơhnhôk vâi krâ nhŏng o pôi tá hmâng tiô rơkong mâu khu ki ‘mêi pơlông djâ tơtrâ Đảng tơnêi têa, đi đo rêh ối ƀă pêi cheăng tiô luât. Tung pơlê pin đi đo kơhnâ, tơrŭm rơtế mơjiâng pơlê cheăm tơná kro mơdrŏng lĕm tâ’’.

Pôa Hà Huy Quang, kăn phŏ ngăn hdroâng kuăn ngo kong pơlê Dak Lak ăm ‘nâi, mâu vâi kơdrâi ki châ kuăn pơlê loi nhuô̆m tung pơlê pơla veăng kum kân khât tung tơdroăng ki mơjiâng cheăng kâ rêh ối pơlê pơla tung hdroâng kuăn ngo. Rơkong tơpui dêi mâu vâi kơdrâi ki châ kuăn pơlê loi nhuô̆m gá kơnía khât, vâ kuăn pơlê loi tâ, hmâng tâ vâ tơkŭm pêi pro tro ‘na tơdroăng tơ’noăng kuăn pơlê a pơlê cheăm xuân môi tiah mơnhông cheăng kâ rêh ối pơlê  pơla kơpong hdroâng kuăn ngo, rế hía rế lĕm tro tâ, tơƀrê tâ.

“Nôkố, khu mâu ngế ki châ kuăn pơlê loi nhuô̆m cho vâi kơdrâi tung kuăn pơlê hdroâng kuăn ngo a kong pơlê mê xuân ôh ti hên, la ƀă mâu tơdroăng ki kal dêi mâu kuăn pơlê hdroâng kuăn ngo kơpong Tây Nguyên rêh ối tiô peăng nôu, mê nâl tơpui, hnoăng cheăng dêi ngế kơdrâi ki châ kuăn pơlê loi nhuô̆m gá kal khât, malối cho tung tơdroăng ki hnê mâu vâi kuăn ‘nĕng, hdroâng hdrê, rơpŏng hngêi, rak vế mâu khôi túa lĕm tro dêi hdroâng kuăn ngo. Ƀă tơdroăng ki mơjiâng ƀă mơnhông cheăng kâ rêh ối pơlê pơla, mơjiâng tơdroăng rêh ối mơhno túa lĕm tro, tung mê ai nâl tơpui, chư chêh dêi mâu kuăn pơlê hdroâng kuăn ngo”.

Ƀă tơdroăng veăng kum ăm pơlê cheăm, jâ H’Bliăk Niê hâk tơngăm châ Khu ngăn hdroâng kuăn ngo kong pơlê Dak Lak diâp ƀâng khĕn kơdeăn cho ngế ki châ kuăn pơlê loi nhuô̆m rơkê tung hnoăng cheăng hnê tối, mơhnhôk kuăn pơlê kơpong hdroâng kuăn ngo veăng tung mơnhông cheăng kâ, rêh ối pơlê pơla, rak vế, gâk kring tơniăn, rak vế khôi túa lĕm tro ƀă tơrŭm pơla mâu hdroâng kuăn ngo.