Tiô pơkâ pêi, hneăng hôp kô séa ngăn, pơkâ mâu tơdroăng ‘na tơkŭm po khu pêi cheăng, tơdroăng rah xo mâu kăn xiâm dêi Tơnêi têa, tơbleăng 9 tơdroăng tơkêa bro luât, pơkâ ‘na luât; tơdrêng amê tơpui tơno 5 khu tơdroăng xiâm kân ‘na cheăng kâ – rêh ối pơlê pơla, liăn ngân tơnêi têa, nơnhên ngăn mâu tơdroăng ki kal ki ê.

  Ki tơtrŏng má môi, Kuô̆k hô̆i kô tơkŭm rah xo tŭm tâi tâng mâu kăn ki xiâm môi tiah Kăn xiâm hnê ngăn tơnêi têa, Ngế pro xiâm hnê ngăn Chin phuh, Kăn xiâm hnê ngăn Kuô̆k hô̆i, mâu Phŏ Kăn xiâm hnê ngăn Kuô̆k hô̆i, Phŏ Ngế pro xiâm hnê ngăn tơnêi têa, mâu ngế pêi cheăng tung Chin phuh ƀă mâu Kơ koan dêi Kuô̆k hô̆i. Tiô tối hdrối  roh hôp tơkŭm po tung 11 hâi, klâ pro péa roh, pơxiâm po a kơxo lơ 6/4/2026 ƀă mơgêi a hâi lơ 24/4/2026.