Pôa Vương Đình Huệ, Kăn xiâm hnê ngăn Kuô̆k hô̆i nếo klêi pơkuâ hneăng hôp  tơpui tơdroăng hbrâ vâ tơkŭm po hôp tung lâp tơnêi têa tơbleăng luât,  tơdroăng pơkâ dêi Kuô̆k hô̆i hneăng 15. A rôh pêi cheăng , mâu tơdroăng hnê tối xuân vâ môi tuăn ƀă tơdroăng tơkŭm po hôp, tối nhên mê cho tíu ki nếo dêi Kuô̆k hô̆i hneăng 15, ai pơxúa kal khât, cho môi tung mâu tơdroăng vâ Kuô̆k hô̆i, mâu kăn Kuô̆k hô̆i, kơ koan kuăn pơlê rah xo vâ rĕng séa ngăn ing apoăng, ing hơngế tơdroăng tơkŭm pêi pro mâu luât, pơkâ hiăng châ Kuô̆k hô̆i tối tơbleăng.

Tối mơgêi rôh pêi cheăng, pôa Vương Đình Huệ, Kăn xiâm hnê ngăn Kuô̆k hô̆i môi tuăn ‘na inâi pơxá Hneăng hôp mê cho “Hneăng hôp tung lâp tơnêi têa tơbleăng luât, tơdroăng pơkâ dêi Kuô̆k hô̆i hneăng 15’’. Hneăng hôp xua Vi ƀan pơkuâ cheăng Kuô̆k hô̆i pơkuâ tơkŭm po, kơ koan tơrŭm ƀă cho Chin phuh, Măt trâ̆n tơnêi têa Việt Nam, Hngêi tơleăng xiâm, Tíu xiâm séa ngăn arak luât kuăn pơlê.

Tíu xiâm riân liăn Tơnêi têa ƀă pơlê kong kơdrâm Hải Phòng - cho tíu chêh inâi tơkŭm po. Hneăng hôp kô châ tơkŭm po tiô tơdroăng mơ’no tơdrêng tơkŭm ƀă mơ’no tiô troăng hyôh tung 1 hâi.