Troh nôkố, tơdroăng hbrâ tơmeăm khoăng tê Têt Lo hơnăm nếo hiăng châ mâu kong pơlê, khu tê mơdró hbrâ tŭm, tơxâng tơtro tơdroăng kal vâ dêi mơngế rôe xúa. Tối hdrối roh Têt Lo hơnăm nếo 2023, tơdroăng kal vâ rôe kế tơmeăm khoăng kô tâk sap ing 10 – 15%, xua mê mâu khu tê mơdró pêt mơjiâng, tê mơdró hiăng thăm pêt mơjiâng, tê mơdró, ‘măn tơmeăm khoăng vâ hbrâ ăm tơdroăng kal vâ hên dêi mơngế rôe xúa, ki rơhêng vâ tối cho mâu tơmeăm kâ, têa ôu.

Vâ rak tơniăn tơdâng tơdroăng mơjiâng pro ƀă kal vâ, rak tơniăn kơchơ tê mơdró sap ing kố troh Têt Lo hơnăm nếo, Khu xiâm pơkuâ kơmăi kơmok tê mơdró pơtối tơrŭm ƀă mâu Khu xiâm, kơvâ cheăng kong pơlê séa ngăn tơdroăng kơchơ mơdró, rak tơniăn tíu mơjiâng mâu tơmeăm ki kal xúa rêm hâi, kum ăm tơdroăng kal vâ dêi mơngế rôe xúa, ki má lối tung mâu roh leh, Têt ôh tá ăm ai tơdroăng ôh tá bê tơmeăm, tơmeăm to kơnâ yă.