VOV4.Xơ Đăng - Ƀơrô dêi Khu hnê mơhno cheăng Tơnêi têa ‘na hbrâ ví khía mơhot têa kân lân lu nếo ai Hlá mơ-éa pơtroh ăm Khu pơkuâ ngăn Ƀơrô hbrâ ví khía mơhot têa kân lân lu ƀă tí tăng tŏng xo mâu ngế hliăng tiâ kong pơlê Kon Tum; mâu Khu xiâm ngăn chiâk deăng ƀă Mơnhông thôn pơlê, Khu xiâm ngăn cheăng kơmăi kơmok ƀă tê mơdró; Grup pơkuâ on tơhrik Việt Nam; Viê̆n rak ngăn tơnêi tơníu ‘na hbrâ ví ƀă tơnêi tơdro a kong pơlê Kon Tum.

Tiô tối tơbleăng ‘na rôh tơnêi tơdro dêi Viê̆n séa ngăn tơnêi tơníu, Viện Hàn lâm Khoa học Việt Nam, hâi lơ 23/8 hiăng pơtối ai 4 rôh tơnêi tơdro a tơring Kon Plông, kong pơlê Kon Tum, tung mê rôh tơnêi tơdro 4,7 đô̆ richter, ôh tá mơhúa râ má môi.

Vâ hbrâ ví, kơdroh ‘na tơdroăng ki tro lŭp xua tơnêi tơdro pro, Ƀơrô cheăng Khu hnê mơhno cheăng tơnêi têa ‘na hbrâ ví kong mê khía mơhot têa kan lan lu pơkâ thế Khu pơkuâ ngăn Ƀơrô hbrâ ví khía mơhot têa kân lân lu ƀă tí tăng tŏng xo mâu ngế hliăng tiâ kong pơlê Kon Tum, mâu Khu xiâm, kơvâ cheăng ƀă mâu kơ koan ki ai tơdjâk mơnhên tối ki tơdjâk ƀă kơlo ki tro tơ’nhiê kế tơmeăm dêi mâu rôh tơnêi tơdro ‘na mâu hngêi ối dêi kuăn pơlê, tíu pêi cheăng, hngêi trung hriâm ƀă kế tơmeăm hngêi trăng troăng klông, teăm châ hlo, ‘mâi rơnêu mâu tơdroăng, kế tơmeăm ki tơ’nhiê tơnhĕng vâ rak tơniăn ăm kuăn pơlê ƀă kế tơmeăm; hbrâ rơnáu mâu ngế cheăng, pơkeăng, rơxế vâ hbrâ ví ƀă ‘mâi mơnhông teăm tơdrêng drêng ai tơdroăng kố.

Katarina Nga tơplôu ƀă tơbleăng