Rôh hôp tơdrêng troh mâu kong pơlê ki ối kĭng têa kơxĭ. Tiô tối tơbleăng dêi khu xiâm ngăn ‘na Chiâk deăng ƀă Hyôh kong prâi, Khu xiâm hiăng pơkâ pêi pro séa ngăn a 15 to kong pơlê ki kal sap nôkố ta troh lơ 9/3/2026, ƀă tơdroăng pêi pro ƀă troăng hơlâ pêi môi tiah EC kô pêi tơdroăng séa ngăn a mâu kong pơlê. Pakĭng mê, mâu kong pơlê, pơlê kong kân kĭng têa kơxĭ tơkŭm séa mơnhên, tăng ngăn tơdroăng hbrâ mơdât tơnăng ká ki pơxá IUU a kong pơlê, hbrâ vâ pêi cheăng ƀă khu kăn séa ngăn rôh má 5 dêi Vi ƀan châu Âu.

Khu xiâm ngăn ‘na Chiâk deăng ƀă Hyôh kong prâi xuân ăm ‘nâi,  mâu kơmăi phần mềm ki pêi cheăng ăm tơdroăng séa ngăn ing mâu tuk tơnăng ká ki hiăng châ pêi pro tro tâi tâng, thăm pro tro ó tâ nếo. Tối mơgêi a rôh hôp, pôa Trần Hồng Hà pơkâ thế mâu Kơvâ cheăng, kong pơlê séa ngăn, tăng ngăn nếo tâi tâng mâu Hlá mơ-éa tơbleăng tối nhên tơdroăng kal dêi Vi ƀan Châu Âu (EC) tơmâng vâ ’nâi. 

Tối mơnhên, ối pa 2 măng tĭng nếo Khu séa ngăn dêi Vi ƀan châu Âu troh séa ngăn, Phŏ ngế pro xiâm hnê ngăn tơnêi têa pơkâ thế pơtối tơbleăng Pơkâ séa ngăn rôh ki hên tung pêi pro hnoăng cheăng hbrâ mơdât tơnăng ká IUU, hlối xing xoăng nhên ăm tơrêm kong pơlê tung lâp tơnêi têa, rơtế ƀă hnoăng pêi pro dêi mâu khu xiâm, kơvâ cheăng xiâm tơnêi têa.