Khu xiâm ngăn troăng prôk ƀă rơxế kơtâu nếo ai hlá mơ-éa pơtroh Ngế pro xiâm hnê ngăn Chin phuh pơkâ mơ’no hiăng pro klêi troăng kân Nha Trang – Cam Lâm a hâi lơ 19/5. Klêi kơ’nâi 2 hơnăm bro, troăng ki kố hiăng châ bro klêi hdrối tâ túa pơkâ 3 khế.

Troăng kân Nha Trang – Cam Lâm xua Grup pơkuâ Sơn Hải pro ngế ki ‘no liăn, tâi tâng kơxô̆ liăn ‘no bro lối 7.600 rơtal liăn, ai tâi tâng ki xŏn lối 49 km, ối tung kong pơlê Khánh Hòa. Tơdroăng tơkêa troăng prôk kố châ kơchuâ bro ƀă 4 to troăng rơxế kơtâu a troăng ki rơdâ 17km, pơto chơ mơdrếo kơxô̆ liăn dâng lối 16 hơnăm.

Troh nôkố, tơdroăng tơkêa troăng kố hiăng klêi. Khu ki ‘no liăn dế tơkŭm mơhnhôk kơmăi kơmok, rơxế, kế tơmeăm mâu ngế cheăng tơkŭm bro tung tâi tâng mâu troăng vâ bro klêi mâu tơdroăng ki kal bro má mơ’nui dêi tơdroăng tơkêa kố môi tiah: Ok ƀê tong, chhá kơxu, sơng tíu ki kơchuâ klâ xoăng troăng, tíu ki klâ kơtăn pơla troăng kân, krâ ‘măn kế ki tât, mâu pul on ki ăm bâ eăng, kơƀeăng ki tơbleăng hnê mơhno, tối tơbleăng, mơgrúa lĕm troăng. Tiô tối hdrối troăng kân Nha Trang – Cam Lâm kô klêi a hâi lơ 19/5 la ngiâ.