Sap hâi lơ 22 troh tâi lơ 26/5 hiăng ai hên khu tê mơdró troh Dak Lak séa ngăn mơ’no liăn cheăng mơnhông mơdêk ôm hyô. Ki nhên, mâu khu tê mơdró ôm hyô a pơlê kong kân Hồ Chí Minh, Hà Nội, Đà Nẵng ƀă Quảng Ninh, hiăng ai roh lăm séa ngăn, châ tâ a mâu tíu ôm hyô ki má môi dêi Dak Lak, môi tiah: kơpong ôm hyô kông vế Ƀuôn Đôn, kơdrum ilâng kong York Đôn, châ hlo rui, lĕm ƀă rui; vo plong châ troh mâu tơdroăng ôm hyô a mâu tíu ôm hyô pơlê pơla ƀă mâu tíu chôu ‘măn tơmeăm khoăng ton nah.

Mâu khu tê mơdró xuân séa ngăn mâu hngêi ăm tơmối kâ koi ối pơtê sap ing 3 troh 5 hơlŏng tung kong pơlê Dak Lak ƀă kĭ tơkâ tơrŭm cheăng ƀă mâu khu tê mơdró ôm hyô a Dak Lak. Klêi kơ’nâi 4 hâi châ troh ngăn, jâ Nguyễn Huyền Trang troh ing Hà Nội tối kal tơrŭm tơ’nôm ƀă mâu kong pơlê ki achê vâ tơkŭm po ôm hyô troh lâp lu, vâ tơmối châ troh xah hêi hên tâ.