Troh tâi khế 9, Lâm Đồng ai 8.160 toăng tuk ká sap ing 6 met tơngi klêng hiăng kĭ, tơ’nôm tung ‘noăng chư chêh tơdroăng tơnăng ká tơnêi têa. Tơtrŏng má môi, kơxô̆ tuk tơnăng ká ai pro xôi IUU ối hên. Sap apoăng hơnăm troh nôkố, khu cheăng dêi kong pơlê hiăng tơkŭm po lối 1.200 rôh séa ngăn, lăm ngăn lối 6.700 tuk tơnăng ká, châ hlo 212 tuk pro xôi, pơxâu phâk tâi tâng kơxô̆ liăn lối 3,7 rơtal liăn.

Kong pơlê Lâm Đồng xuân séa ngăn, mơnhên dâng 300 tuk tơnăng ká tơ’lêi ai tơnăng ká ôh tá tro luât a kơpong têa kơxĭ kong têa ê ƀă 864 tuk ôh tá tŭm pơkâ pêi cheăng, vâ xing xoăng hnoăng pơkuâ krá tơniăn tuk ká ƀă ngế cheăng tung tuk. Khu hnê mơhno tơnêi têa pơchân tối, tơdroăng pơkuâ tuk ká a Lâm Đồng xuân ối hên tơdroăng kal pro ăm i tơniăn lĕm. Kơxô̆ tuk ká ai xôi ƀă tuk ôh tá tŭm pơkâ pêi cheăng ối hên ƀă tâi tâng lối 1.500 tuk.

Drêng ai pơkâ hbrâ mơdât tơnăng ká xi xŏng IUU, Vi ƀan kong pơlê Lâm Đồng hiăng tơbleăng 2 tíu tuk ká pơtân, mơjiâng ‘noăng chư chêh pơkuâ tuk prôk lăm rêm hâi. Séa ngăn mâu tíu troh ki tuk ká đi đo prôk mot pơtân, tơdrêng amê pơcháu hnoăng ăm rêm kong pơlê séa ngăn a mâu kơno kố.