Pơxiâm po sap ing khế 3/2026, Rôh tơ'noăng hiăng tơdah tơdroăng ki veăng kơdrâm dêi đoân viên, droh rơtăm tung lâp tơnêi têa, ƀă lối 462.600 ƀai tơ'noăng, ƀă 6 khu tơdroăng tơ’noăng mê cho Hlá tơbeăng, Tạp chí, Rơ'jíu, Um tơvi, Video ƀă Đồ họa, mơjiâng tíu vâ đoân viên, droh rơtăm mơhno tơdroăng xiâm chính luận ƀă hên troăng, tơtro ƀă tơdroăng nếo nôkố. Khu tơkŭm po hiăng rah xo diâp 59 ƀai ki rơkê má môi ƀă 1 pri khu pú hên ăm tíu pêi cheăng ai kơxô̆ ƀai veăng tơ’noăng hên má môi.  

Ing tơdroăng ki ai khât tơbleăng Rôh tơ'noăng hơnăm 2026, Khu xiâm pơkuâ Đoân droh rơtăm mơnhên pơtối pơ'lêh nếo tơdroăng, troăng pơtâng tối, hnê hriâm kal kí, tuăn mơno; mơdêk xúa kŏng ngê̆ ƀă mơnhông hnoăng ki hbrâ rơnáu, rơkê plĕng dêi droh rơtăm tung tơdroăng xúa kŏng ngê̆ măng internet, tơdrêng amê mơjiâng tơ'nôm tíu vâ mâu ngế hơnăm ối nếo veăng tơdrêng tung tơdroăng rak vế xiâm kối tuăn mơno dêi Đảng.