Kơxo hâi lơ 1/4, po hôp tơbleăng mâu pơkâ dêi Khu xiâm kal kí ‘na hnoăng cheăng pêi, tơrŭm cheăng mâu kăn, pơkâ xoăng, rah xo ngế pơkuâ xiâm dêi Rơ’jíu um tơvi Việt Nam, Rơ’jíu xiâm Việt Nam, Thŏng tâ̆n xah Việt Nam, Viện Hàn lâm Khoa hok xah hô̆i Việt Nam, Viện Hàn lâm Khoa học ƀă Kŏng ngê̆ Việt Nam cho kơ koan dêi Chin phuh mot ƀă Tíu pêi cheăng dêi Khu kăn xiâm Đảng ƀă mâu pơkâ ki tơdjâk troh. Hneăng hôp vâ hơ’lêh Pơkâ kơxô̆ 03 hâi lơ 25/3/2026 dêi Khu kăn Tíu xiâm Đảng hneăng 14.

A rôh hôp, teăng mâ Khu tơrŭm Tíu xiâm hiăng tơbleăng mâu pơkâ dêi Khu xiâm kal kí, tung mê, ai xoăng, pôk pôa Đỗ Tiến Sỹ, Ngế cheăng tung tíu xiâm Đảng pro Ngế xiâm pơkuâ Rơ’jíu Việt Nam, hlối pro Phŏ pơkuâ tăng ‘nâi plĕng mâu tơdroăng ƀă gum pêi cheăng ăm Khu xiâm pơkuâ hnê ngăn Đảng, veăng tung khu kăn, Khu pơkuâ cheăng Đảng ủi mâu kơ koan Đảng tíu xiâm hneăng 2025-2030.

Tơbleăng hnê mơhno a rôh hôp, pôa Trần Cẩm Tú pơkâ thế mâu kơ koan chêh hlá tơbeăng pơtối rak vế pêi pro hnoăng cheăng xiâm tung tơdroăng cheăng ‘na tuăn loi, mơdêk ki tơƀrê troăng hơlâ tơpui, hbrâ tơplâ mơdât mâu tơdroăng ki lâi ôh tá tro, ƀă hiâm mơno krá kak, rơkê. Tơbleăng a rôh hôp pôa Phạm Minh Chính, Ngế pro xiâm hnê ngăn tơnêi pơkâ thế rak ki tơrŭm krá dêi rơpó, pơtối rak hnoăng hiăng pêi pro, pê klêi tơdroăng hiăng pơcháu.

Tơdroăng ‘mâi rơnêu tơkŭm nếo rôh kố kô ai pơxúa troăng hơlâ, veăng mơdêk ki tơbrê ‘na hnoăng pơkuâ, ai pơxúa tung pêi cheăng dêi mâu kơ koan chêh hlá tơbeăng, tăng ‘nâi plĕng khoa hok.