Troh a kơmăng kố, a Hà Nội, hiăng po Leh diâp Pri hlá tơbeăng tơnêi têa roh má 17 hơnăm 2022, ai 124 ƀai hlá tơbeăng ki chêh tối rơkê má môi dêi mâu ngế, mâu khu ki chêh hlá tơbeăng châ pơ-ô pơ-eăng.

Pôa Vương Đình Huệ, kăn xiâm hnê ngăn Kuô̆k hô̆i tối nhên, tơkâ luâ 98 hơnăm mơjiâng ƀă mơnhông mơdêk, Hlá tơbeăng Kăch măng Việt Nam xua kăn xiâm hnê ngăn tơnêi têa - Pôa Hồ Chí Minh mơjiâng ƀă pơkuâ hiăng đi đo rơtế prôk tung mâu rôh tơplâ dêi kăch măng veăng kum kal khât tung tơdroăng cheăng mơjiâng ƀă rak vế tơnêi têa.

Xua tơdroăng hlá cơ dêi Đảng, kơvâ hlá tơbeăng kăch măng Việt Nam ôh tá la lâi pơtê mơnhông tung tâi tâng ‘na tơdroăng ki tro, túa pơkâ ƀă tíu pêi cheăng. Mâu rơxông mâu ngế ki chêh ‘na hlá tơbeăng tơnêi têa châ ‘mâi mơnhông, mơdêk ƀă mơ-eăm tơxâng ƀă hdroâng mơngế, loi tơngah mot tơrŭm cheăng, ai hên tơdroăng ki lĕm tro ƀă tơdroăng ki mơnhông dêi hlá tơbeăng ƀă um tơvi kong têa ê. Tâi tâng veăng kum tối rơdêi ƀă ô eăng hnoăng cheăng, ivá rơdêi ƀă tơdroăng loi tơngah Việt Nam.

“Á hâk tơngăm khĕn kơdeăn ƀă rơkâu mâu ngế chêh hlá tơbeăng tung lâp tơnêi têa hiăng mơ-eăm, pêi châ hên mâu tơdroăng tơƀrê ki kân. Malối, á mơnhên tối khât ivá veăng kum dêi mâu vâi pú ki cheăng pơkuâ hnê mơhno, pơkuâ ngăn hlá tơbeăng hiăng pêi klêi rơkê hnoăng cheăng, pro tơ’lêi hlâu vâ hlá tơbeăng rế hía rế mơnhông, mơdêk ki rơkê dêi hlá tơbeăng Kăch măng, veăng kum kal khât tung tơdroăng cheăng hơ’lêh nếo ƀă mot tơrŭm cheăng ƀă kong têa ê dêi tơnêi têa pin.

Á tối nhên tơdroăng veăng kum hnoăng kân kĭn dêi mâu khu râ pơkuâ ngăn khu chêh hlá tơbeăng Việt Nam sap ing tơnêi têa troh kong pơlê tung tơplâ 73 hơnăm hdrối nah ôh tá pơtê mơ-eăm po rơdâ, pêi pro kơtăng tơrŭm mâu khu, hnê tơ’nôm ƀă rak vế hnoăng ƀă ki pơxúa tơxâng dêi mâu hô̆i viên”.

Xuân tung tơbâ 98 hơnăm Hâi Hlá tơbeăng Kăch măng Việt Nam, ngế xiâm pơtâng tối tơdroăng kal Tơnêi têa - pôa Nguyễn Trọng Nghĩa hiăng pơkuâ po rôh trâm mâ, pêi cheăng ƀă kăn pơkuâ mâu kơ koan chêh hlá tơbeăng ‘na tơdroăng kal kí ki xiâm. Ngế xiâm pơtâng tối tơdroăng tơnêi têa ăm ‘nai, 12 to kơ koan chêh hlá tơbeăng kal kí ki xiâm hiăng tơbleăng hnoăng cheăng hnê, hnê tơ’nôm ăm mâu ngế ki chêh hlá tơbeăng, ngế rah chêh, kăn ƀô̆, ngế chêh hlá tơbeăng tá tơdroăng ki rơkê tung tơpui kal kí ƀă rơkê tung pêi cheăng, pêi pro hơ’lêh kơxô̆ hlá tơbeăng, cho mâu kơ koan chêh hlá tơbeăng ki djâ troăng ahdrối tung mơjiâng tơdroăng mơhno túa lĕm tro tung kơ koan chêh hlá tơbeăng.

Pôa Nguyễn Trọng Nghĩa, ngế xiâm pơkuâ khu pơtâng tối tơdroăng kal Tơnêi têa tối nhên:

“Hâi hlá tơbeăng Kăch măng hơnăm kố, pin hvái ngăn 2 hơnăm 6 khế pêi pro Pơkâ Hneăng hôp rôh 13 dêi Đảng – tơdế hneăng hơnăm pêi cheăng ƀă troăng ngăn tơkŭm po mâu tơdroăng cheăng tơbâ 100 hơnăm Hâi hlá tơbeăng Kăch măng gá tro khât. Tiah mê, ai mơnhên tối tŭm mâu hnoăng cheăng ki kal tung 2 hơnăm tơdế, tơdế hneăng hơnăm pêi pro tơdroăng Pơkâ Hneăng hôp rôh 13 tung hnoăng cheăng chêh hlá tơbeăng hnê tối, tơkŭm tung mâu kơ koan chêh hlá tơbeăng ki xiâm dêi Đảng dêi Chin phuh, râ Đảng pơkuâ”.

Hâi lơ 21/6, cho hâi mơdĭng dêi mâu ngế ki cheăng ‘na chêh hlá tơbeăng kăch măng lâp tơnêi têa. A pơlê kong xiâm Hà Nội, kong măng lơ 21/6, po Leh diâp pri hlá tơbeăng Tơnêi têa rôh má 17 hơnăm 2022, ƀă 124 to ƀai chêh ki rơkê má môi dêi mâu ngế ki chêh, khu ki chêh châ ô eăng. Pri tơ’noăng rôh kố ai lối 1.890 ƀai pơtroh tơ’noăng, ai 157 ƀai châ mot tung Chung khảo, Hô̆i đong tơ’noăng hiăng rah xo châ 124 ƀai ki rơkê má môi vâ diâp pri, tung mê ai 9 pri A, 24 pri B, 46 pri C, 45 pri Mơhnhôk.

Tiô mơnhên tối dêi Hô̆i đong tơkŭm po, mâu ƀai chêh ki pơtroh tơ’noăng hiăng chêh tro tung mâu inâi ki kân sap ing tơdroăng kal kí, cheăng kâ, mơhno túa lĕm tro, pơlê pơla, gak kring cheăm bêng, gâk kring mâu kơvâ cheăng ki ê dêi tơdroăng rêh ối tơnêi têa tung hơnăm 2022, tơbleăng um ki tro khât dêi mâu tơdroăng tơkŭm po ki kal dêi tơnêi têa.

Jâ Đỗ Thị Thu Hằng, ngế xiâm ngăn hnoăng cheăng Khu ngăn chêh hlá tơbeăng Việt Nam, kăn phŏ hnê ngăn Hô̆i đong sơ khảo Pri hlá tơbeăng tơnêi têa rôh má 17 ăm ‘nâi:

“Mâu ƀai ki pơtroh tơ’noăng hơnăm kố hlo rơkê. Ki hên mâu ƀai tơ’noăng chêh tung tơdroăng ki ai khât, tơdroăng kal, chêh mâu tơdroăng ki xiâm tung hơnăm 2022 tung mâu kơvâ cheăng kal kí, cheăng kâ, rêh ối pơlê pơla, gâk kring pơlê pơla cheăm bêng, mơjiâng Đảng ƀă hên ki ê. Hên ƀai châ chêh rơkê, ki kal rĕng cho tơdroăng ki hơ’lêh nếo, tơbleăng mâu troăng hơlâ, luât dêi pơkâ dêi Đảng, Tơnêi têa; pơkâ mơ’no hên troăng hơlâ pơkâ bro, túa pêi lơ ai tơdroăng ki tơdjâk kân tung pơlê pơla. Hên ƀai chêh rơkê, châ mơ-eăm chêh kơtăng, ai xiâm kối, túa ki mơhno achê hmâ, ro ăm ngế ki pơchuât”.

Tơdroăng ki nếo dêi pri tơ’noăng rôh kố cho, pakĭng mâu kơ koan chêh hlá tơbeăng Tơnêi têa, hlá tơbeăng kong pơlê hiăng mơhno nhên tơdroăng ki hơ’lêh nếo rơkê, tơdroăng ki hên túa hlá tơbeăng, hên tơdroăng. Hên Khu ngăn Khu chêh hlá tơbeăng kong pơlê hiăng mơ-eăm tung hnoăng cheăng rah xo, mơdêk ki rơkê dêi mâu hlá tơbeăng ki veăng tơ’noăng.

Pri hlá tơbeăng tơnêi têa rôh má 17 hơnăm 2022, túa hlá tơbeăng um ai hên ƀai chêh tro rơkâ tâ hơnăm hdrối, malối cho a mâu tíu pêi cheăng, kong pơlê hiăng mơ-eăm chêh rơkê ăm ƀai tơ’noăng, pơtroh ƀai tơ’noăng hên tâ, ai mâu um, phóng sự um mơhno tơdroăng ki châ hlo ki hlê plĕng, túa mơhno tối rơkê.