Tiô ƀai chêh dêi hlá tơbeăng kong têa Malaisia- BERNAMA, hneăng tâ phĭu po tung pơla Việt Nam dế mơdêk pê klêi tơdroăng kal kí pơxúa ăm mâu tơdroăng pơkâ mơnhông ton hơnăm. Tối tơbleăng hneăng tâ phĭu ôh tí xê to rôh vâ kuăn pơlê tung lâp tơnêi têa pê tơdroăng cheăng ki pơxúa dêi kuăn pơlê, rah xo mơngế ki ai tuăn mơno lĕm, tơdrăng rơkê, vâ teăng mâ kuăn pơlê tối tơbleăng tơdroăng tơná púi vâ dêi kuăn pơlê ăm  tung Kuô̆k hô̆i ƀă Hô̆i đong kuăn pơlê rêm râ hneăng ki nếo, mê ối cho rôh tơbleăng tối nhên  tơdroăng Pơkâ hneăng hôp má 14 dêi Đảng Kong sản Việt Nam, rơtế ƀă mâu tơdroăng cheăng ‘na kăn ƀô̆ ƀă hnoăng cheăng pêi dêi rêm râ, rêm kơvâ cheăng.

A kong têa Sinuâ, hlá tơbeăng Tân Hoa xã tối nhên ki kân ƀă tơdroăng tơkŭm tâ phĭu rak xo kăn, ăm ‘nâi ai vâ chê 79 rơtuh ngế kuăn pơlê Việt Nam veăng tâ phĭu rah xo kăn ăm 500 ngế kăn Kuô̆k hô̆i hneăng má 16, hlối rah xo mâu kăn Hô̆i đong Kuăn pơlê rêm râ hneăng ki nếo. Môi tiah hlá tơbeăng Nikkei Asia dêi Nhuk xuân tối  hneăng tâ phĭu cho rôh kuăn pơlê veăng rah xo mâu ngế ki teăng mâ ai rơkong tơpui rơkê ƀă pơxúa ăm dêi tơná.