Drêng troh tơbâ 98 hơnăm Hâi Hlá tơbeăng Kăch măng Việt Nam, kơxê hâi lơ 16/6, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i trâm mâ mâu kăn hnê mơhnhôk cheăng kal kí xiâm tơnêi têa, Khu xiâm ngăn ‘na tơdroăng nếo ai ƀă Hyôh rơ’jiu internet, Khu chêh hlá tơbeăng Việt Nam, mâu ngế chêh hlá tơbeăng hơnăm hiăng krâ, teăng mâ kăn xiâm mâu kơ koan chêh hlá tơbeăng cho mâu ngế tung Hô̆i đong ki châm ƀai apoăng ƀă khu Châm mơ’nui dêi hneăng tơ’noăng kâ pri Diên Hồng rôh má môi, kăn hnê ngăn mâu kơ koan chêh hlá tơbeăng a râ Xiâm tơnêi têa ƀă kong pơlê.

Pôa Vương Đình Huệ, kăn xiâm hnê ngăn Kuô̆k hô̆i tối nhên, Kuô̆k hô̆i đi đo tơmâng pê klêi ‘na hnoăng cheăng, luât pơkâ tŏng kum ƀă mâu kơvâ tối tơdroăng nếo ai, hyôh rơ’jiu, hlá tơbeăng. Tung la ngiâ, pôa Vương Đình Huệ, Kăn xiâm hnê ngăn Kuô̆k hô̆i pơkâ thế khu chêh hlá tơbeăng kal pơtối rak vế hnoăng ki rơdêi, ivá rơdêi vâ cho môi tung mâu ngế ki kal, veăng ‘no hnoăng pêi pro ƀă hơ’lêh nếo Tơnêi têa pêi pro tro tiô luât xah hô̆i chuh nghiah Việt Nam, tơtro ƀă tơdroăng mơnhông hơniâp lĕm ƀă rơkê plĕng dêi rơxông, kring vế ƀă mơnhông mơdêk tâi tâng hnoăng cheăng pơ’lêh nếo tâi tâng, tơdâng tơ’mô, tơrŭm ƀă lâp plâi tơnêi ƀă púi vâ Việt Nam xông rơdêi hơnăm 2045.