A poh 251, cheăm Ea Bung, tơring Ea Súp, achê troăng kân tơnêi têa 14C, achê ƀă Kơdrum ilâng kong tơnêi têa Yok Đôn, hên loăng kong kân sap ing 10 – 40 cm, xŏn 3  - 4 met hiăng tro gu kơtong tơlâk tá xiâm, gô̆m tơkŭm hên môi tíu. Tung ƀăng deăng kong tro ko ‘nhê, chât ha hiăng châ pêt loăng keo lai tơvât ƀă alâi. Pôa Nguyễn Thanh Hồng, ối a cheăm Ea Bung, tơring Ea Súp, môi ngế tơrŭm veăng tơdjêp pêi pro tơdroăng tơkêa bro tối ăm ‘nâi, kong tro ko ‘nhê ối tung poh 251, xua djâ Trịnh Thị Hương, nôkố cho Kăn pơkuâ Kŏng ti pêt kong 27/7 pơkuâ. Tâi tâng ƀăng kong tro ko ‘nhê dâng 100 ha.

Pôa Nguyễn Thanh Hồng tối:

“Khế 7 hơnăm 2021 jâ Hương ăm mơngế ƀă kơmăi kơmok gu gô̆m pro lĕm 40 ha kong, klêi mê troh khế 5/2022 mê jâ pơtối gô̆m pro lĕm 60 ha nếo. Tâi tâng kếo ‘nhê kong 2 hơnăm pơla kố nah cho 100 ha. Nếo achê kố khu râ kăn séa ngăn hiăng mot séa ngăn, laga xuân tá hâi hlo tiâ tối ăm mâu khu tơrŭm pêi cheăng dêi kŏng ti ngin’’.

Hrĭng ha kong hiăng tro Kŏng ti pêt kong 27/27 kếo ‘nhê kong vâ pêt loăng keo

Tơdroăng tơkêa bro pro ăm i lĕm, gâk ngăn kong ƀă mơnhông pêt kong châ Vi ƀan kong pơlê Dak Lak môi tuăn ăm Kŏng ti pêi cheăng tiô rơnó môi khu pêt kong 27/7 pêi pro ing pơkâ kơxô̆ 2959, a khế 11 hơnăm 2010. Tâi tâng ƀăng tơnêi kong châ pêi pro tơdroăng tơkêa bro cho 783,4 ha, a pôh xá 251, cheăm Ea Bung, tơring Ea Súp. Pơkâ xiâm dêi tơdroăng tơkêa bro cho mơjiâng pêi kong ƀă pêt mơjiâng tơmeăm ing chiâk deăng hlối gâk ngăn kong.

Ngế teăng mâ tiô luât ƀă pro kăn pơkuâ kŏng ti apoăng cho pôa Nguyễn Văn Quê, ối a kong pơlê Tây Ninh ƀă troh hơnăm 2017 mê pơ’lêh, pơcháu ăm jâ Trịnh Thị Hương, ối a kong pơlê Đồng Nai.

Tiô pôa Nguyễn Ngọc Luật – Kăn phŏ hnê ngăn Vi ƀan cheăm Ea Bung, tung pơla kố nah kơ koan cheăng ai tơdah tơdroăng tiâ tối dêi kuăn pơlê ƀă mâu ngế tơrŭm pêi cheăng Kŏng ti pêi cheăng tiô rơnó môi khu pêt kong 27/7 pêi pro tơdroăng tơkêa bro ai hên tơdroăng ki pro xôi. Cheăm hiăng tơrŭm ƀă Khu pơkuâ gak ngăn kong tơring Ea Súp rơtế mâu ƀơrô cheăng dêi tơring mơjiâng khu râ kăn séa ngăn.

Hên loăng kong kân 30 – 40 cm, xŏn 3 – 4 met

Klêi kơ’nâi séa ngăn châ hlo tơdroăng pơkuâ gâk ngăn kong, pêt kong, pêt mơjiâng tơmeăm pêi lo ing chiâk deăng hlối gâk ngăn kong dêi khu tê mơdró kố tá hâi tơniăn tiô tro troăng pêi ki Vi ƀan kong pơlê Dak Lak kĭ. Ki rơhêng vâ tối, hiăng ai lối 326/783 ha kong tro kơdroh; pêt chât ha kong pêt těng, hdi ƀăng tơnêi kong ki ai xêh; pêi pro tơbleăng tơdroăng kong ôh tá môi tiah ƀă tơbleăng tơdroăng ki ai khât kong nôkố dêi Tíu xiâm pơkuâ gâk ngăn kong tơring Ea Súp.

“Mơ’nui khế 9 pơla kố nah, cheăm ai tơrŭm ƀă Tíu gâk ngăn kong tơring Ea Súp tơkŭm séa ngăn. Klêi kơ’nâi séa ngăn, ƀăng tro gu ối tung pơkâ mơnhông pêt kong krá tơniăn, ƀă khu tê mơdró vâi hiăng pêt vâ chê 62 ha loăng keo lai a mê. Tiô tơdroăng hnoăng cheăng, vâi ôh tá ăm phêp pêt kong a mê. Tung la ngiâ, cheăm kô pơtối pơkâ thế mâu kơ koan cheăng ki rơkê cheăng ƀă ai hnoăng vâ tơleăng tơdroăng kố’’.

Loăng keo lai châ pêt hdi tơnêi kong ki ai xêh

Pôa Nguyễn Như Hoàng – Kăn pơkuâ tíu gâk ngăn kong tơring Ea Súp tối, a tơdroăng tơkêa bro ăm i lĕm, gâk ngăn ƀă mơnhông pêt kong dêi Kŏng ti pêi cheăng tiô rơnó môi khu pêt kong 27/7 ối a cheăm Ea Bung, ôh tá xê to xôi ‘na tơdroăng pơkuâ gâk ngăn kong, gu ăm tơbăng, mơjiâng, kếo ‘nhê kong ôh tá tro luât pêt loăng plâi kâ, mê ối ai tá pro xôi tơdjâk troh ăm dêi pó tơnêi kong. Mâu tơdroăng pro xôi kố cho xôi kân, laga hnoăng pơxâu phâk cho ối tung râ kơpêng  xua mê tíu pơkuâ gâk ngăn kong hiăng pro mơ-éa pâ thế vâ pơxâu phâk mâu ngế ki tơdjâk.

Pôa Nguyễn Như Hoàng tối:

“Tíu xiâm gâk ngăn kong tơring hiăng pơkâ thế Kơ koan xiâm gâk ngăn kong kong pơlê Dak Lak pơkâ Kŏng ti pêi cheăng tiô rơnó môi khu pêt kong 27/7 thế tối tơbleăng ƀă mơnhên xiâm kối kong tro kơdroh lối 326 ha kong ƀă tơdroăng pro pơhôi pơkuâ gâk ngăn kong; tơkŭm séa ngăn tâi tâng tơdroăng tơkêa bro ‘na mơnhên hnoăng cheăng, pôu râng hnoăng cheăng dêi Khu pơkuâ tá mơngế ton ƀă mơngế nếo xuân môi tiah mâu ngế krê ki tơdjâk. Pâ thế Vi ƀan tơring pơkâ Kŏng an tơring Ea Súp tơdah hô sơ roh tơdroăng vâ tơleăng kơtăng tiô pơkâ luât dêi luât”.

A tơring Ea Súp, kong pơlê Dak Lak ai 26 tơdroăng tơkêa bro pơcháu kong, ăm mung kong, mơnúa tơrŭm pêt mơjiâng tơmeăm khoăng tung ƀăng kong ƀă gâk ngăn kong, tâi tâng deăng vâ chê 20 rơpâu ha. Laga, hluâ lối 10 hơnăm po rơdâ pêi pro, hên tơdroăng tơkêa bro ôh tá mơnhông châ tơƀrê, lôi ăm ai thăm hên tơdroăng kếo ‘nhê kong, hdi xo tơnêi kong. Tung mê, ai tá tơdroăng pơcháu ăm dêi pó tơnêi, kếo tâi tâng loăng kong vâ pêt prá, alâi, loăng plâi ton hâi, thăm nếo xing xoăng ƀăng tơnêi, tê tơnêi.