Tung mê, tơdroăng ki xiâm Pơkâ pêi kong pơlê Dak Lak hneăng hơnăm 2021 – 2030, tơmiât pêi troh hơnăm 2050 ai kơnâ kal khât. Pơkâ pêi tơmiât la ngiâ tơdroăng mơnhên inhên troăng pêi la ngiâ, ivá tơtêk, cho tơmeăm ki djâ mơnhông vâ rah xo tro mơngế pêi cheăng, kơxô̆ liăn mơ’no cheăng, mơhnhôk tơdroăng tơkêa bro ƀă tơpui ƀă pêi pro tâi mâu tíu ki kreăng.

Tơdrêng amê, pơkâ pêi tiô hnê mơhno dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên: Dak Lak kal pơhlêh nếo tơmiât, ing pơkuâ kong pơlê troh mơjiâng troăng pêi cheăng rơkê mơnhông mơdêk ton xŏn, mơnhên hnoăng ako tơdjêp Tây Nguyên ƀă mâu kơpong cheăng kâ ƀă troăng prôk tơnêi têa. Pakĭng mê, tơdroăng pơkâ pêi, hneăng hôp xuân châ séa ngăn tơbleăng mâu pơkâ tơdjâk troh yă tơnêi, inâi xo tơvêh tơnêi, mơ’no liăn cheăng tơnêi têa, tơdroăng mung liăn troăng hơlâ, rak vế khôi túa lĕm tro chêng koăng, rơtế khu pêi cheăng ƀă pơkâ pêi dêi Hô̆i đong kong pơlê Dak Lak.