VOV4.Xơ Đăng - Hâi lơ 16/9, Vi ban hnê ngăn kong pơlê Dak Nông hiăng po hneăng hôp khoa hok vâ tơmâng xo rơkong veăng tơpui tối dêi mâu kăn, kuăn pơlê tung tơdroăng hdró kơpong tơnêi tíu Dak Nông hneăng 2021-2030, hnoăng cheăng vâ pêi pro troh a hơnăm 2050, ai hên mâu kăn ki hriăn plĕng ‘na tơdroăng tơpui tíu, kŏng ti hnê mơhno cheăng dêi kong têa ê, khu kăn teăng mâ mâu Grup ki kân.

A chôu phut hop mê, mâu kăn hiăng tơpui leăng, mơnhên rơhí rơhó, veăng hnê tối vâ ăm Dak Nông châ ‘nâi, châ plĕng nhên mâu tơdroăng ki ối ‘ro ƀă ai mâu troăng hơlâ, túa cheăng vâ kong pơlê mơnhông, pêi pro châ tơƀrê mâu tơmeăm khoăng ki tơná akố hiăng ai hlâu xêh, ing mê, kô kâi châ mơdêk tung tơdroăng cheăng pêi cheăng kâ, pêi lo kế tơmeăm, mơnhông tơdroăng rêh kâ ối pơlê pơla.

Tâ tá hneăng hôp

Tiô tiê̆n sih Nguyễn Trọng Uyên, cho Kăn phŏ Viê̆n hriăn plĕng ‘na ‘mâi hdró kơpong tơnêi rêh ối, tơnêi pêi kâ hneăng hdrối ăm ‘nâi, môi tung mâu tơdroăng kal athế vâ tŏng kum ahdrối tung hneăng ki hdró tơnêi tíu, mê kong pơlê Dak Nông athế  mơdêk pêi pro mâu tơdroăng cheăng, xúa mâu tơmeăm khoăng ki hiăng ai hlâu, ki ai krê xêh.

Ki krê xêh akố, mê cho bauxite cho ai hên má môi lâp plâi tơnêi, ai hyôh kong prâi rơngiâp lĕm plâ hơnăm, ai Tíu hyô ngăn cho tơnêi hmốu dêi lâp plâi tơnêi UNESCO hiăng mơnhên; cho kong pơlê ki ối a tơdế tơdjêp pơla Tây Nguyên ƀă Đông Nam bộ, cho mâu tơdroăng ki tơ’lêi vâ mơnhông mơdêk ó rơdêi ‘na cheăng kơmăi kơmok chiâ xo tơmeăm kơnía tung kơdâm tơnêi ƀă tơdroăng tơdah tơ’mot tơmối mot ôm hyô.

Nhat Lisa tơplôu ƀă tơbleăng