VOV4.Xơ Đăng - Klêi kơ’nâi 2 hâi pêi cheăng, kơxo lơ 14/10, Hneăng hôp Khu kăn Đoân Droh rơtăm Kŏng san Hồ Chí Minh kong pơlê Gia Lai rôh má 15 sap hơnăm 2022 -2027 ƀlêi chiâng tơniăn lĕm. Hneăng hôp hiăng tơbleăng mâu tơdroăng pơkâ dêi sap ing hơnăm 2022 – 2027. Tung mê, rêm hơnăm, tâi tâng kăn ƀô̆ Đoân, đoân viên ai 80% rơtăm châ hriâm tâp, séa ngăn, hnê tối, tơbleăng tơdroăng pơkâ, troăng hơlâ tơdjâ hnê dêi Đảng, luât dêi Tơnêi têa ƀă tơdroăng pơkâ, mơgêi, troăng hơlâ dêi Đoân.

Hneăng hôp khu Đoàn Droh rơtăm Kŏng san Hồ Chí Minh Gia Lai ƀlêi chiâng  tơniăn lĕm

Po rơdâ ngế ki djâ troăng ahdrối, tơdroăng ki lĕm tung hriâm tâp ƀă pêi pro tiô troăng tơdjâ hiâm mơno Hồ Chí Minh. Rêm hơnăm, pêt nếo ki vâ iâ 300 rơpâu xiâm loăng ngiât. Tơrŭm tơkŭm po tiâ mơnhên, tơmiât troh mâu tơdroăng cheăng ăm lối 40 rơpâu ngế droh rơtăm hdroâng kuăn ngo; tiâ mơnhên, tơbleăng tơdroăng cheăng pêi ăm 20 rơpâu ngế droh rơtăm ƀă hên ki ê.

Hneăng hôp kố hiăng pôk Khu pơkuâ ngăn Đoân Droh rơtăm kong pơlê Gia Lai hneăng 15 ai 40 ngế; Khu pơkuâ ngăn Đoân Droh rơtăm xiâm kong pơlê ai 11 ngế; mâu kăn xuân hiăng pôk 11 ngế kăn ki châ veăng hôp a Hneăng hôp khu kăn Đoân Droh rơtăm Kŏng san Hồ Chí Minh lâp tơnêi têa rôh má 12, hneăng hơnăm 2022 – 2027.

VOV Tây Nguyên/Tơplôu: Katarina Nga