Hâi lơ 5/7, Khu kăn Đảng ƀô̆ kong pơlê Dak Lak tơkŭm po hôp rôh má 18 (po rơdâ).  A rôh hôp mâu kăn hiăng tơpui, tơbleăng mâu troăng rơhlâ mơnhông cheăng kâ - rêh ối 6 khế mơ’nui hơnăm. Tung mê, tơkŭm tăng troăng vâ mơdêk rĕng ‘na mơjiâng tơmeăm khoăng ƀă xo liăn ngân vâ pêi mâu tơmeăm khoăng tơnêi têa, pêi ahdrối mâu cho 3 tơdroăng cheăng pơkâ dêi tơnêi têa, tơdroăng ‘mâi mơnhông ƀă mơdêk cheăng kâ, tơdroăng ‘mâi xĕn tơnêi hngêi trăng chêl thiăn liăn gu tơbăng tơnêi vâ pro troăng kân tơdrăng lĕm Buôn Ma Thuột - Khánh Hòa. Mơdêk tơdroăng pêi pro tâi tâng kuăn pơlê veăng kring tơniăn tơnêi têa, ‘mâi mơnhông cheăng lêng, rak cheăng kal kí tơniăn rêh ối pơlê pơla.

Tối tơbleăng a rôh hôp, pôa Nguyễn Đình Trung, Kăn hnê ngăn Đảng kong pơlê Dak Lak tối thế: Tung la ngiâ, râ ủy, mâu kăn rêm râ, mâu kơvâ cheăng pơtối tơmâng khât pêi tro mâu tơdroăng cheăng kal kí dêi kong pơlê pơtối hơ’lêh nếo, mơdêk tơƀrê, pêi ai pơxúa tung hnê mơhno, séa ngăn, hnê tối tơbleăng pêi mâu pơkâ, dêi tơnêi têa ƀă mâu pơkâ dêi kong pơlê pơcháu.