VOV4.Xơ Đăng - Ƀă tơdroăng pêi pro “Khên tơnôu, rơhêng vâ, djâ troăng ahdrối, tơmiât rơkê”, kơxo lơ 12/10, 450 ngế ki rơkê cho hơnăm ối nếo tâi tâng khu lêng hiăng veăng hôp a Hneăng hôp khu kăn Đoân Droh rơtăm Kŏng san Hồ Chí Minh Khu lêng rôh má 10, hneăng hơnăm 2022 – 2027.

Tơpui hnê mơhno hneăng hôp, teăng mâ Khu Đảng lêng Tơnêi têa, kăn pơkuâ Khu xiâm pơkuâ ngăn lêng, Đăi tươ̆ng Phan Văn Giang tơmâng xo ƀă mơnhên tối khât mâu hnoăng cheăng ki pleăng kân kĭn ƀă tơdroăng ki rơkê, chiâng dêi droh rơtăm Khu lêng; Tơdrêng amê hlối tối nhên hnoăng cheăng dêi kăch măng, dêi Khu lêng tung pơla hneăng ki nếo pơkâ a mâu vâi hơnăm ối nếo tối tơdjuôm ƀă droh rơtăm Khu lêng tối krê pôu râng tâi ivá ki hngăm.

Tối nhên 5 hnoăng cheăng vâ mơnhông ivá kân kĭn, hnoăng cheăng djâ troăng ahdrối, rơkê dêi droh rơtăm ƀă hnoăng cheăng Đoân tung mê Đăi tươ̆ng Phan Văn Giang tối nhên kal mơdêk hnoăng cheăng hnê hriâm kal kí, hiâm mơno, túa rêh ối ăm droh rơtăm mơ-eăm pêi klêi mâu hnoăng cheăng châ pơcháu, veăng kum mơjiâng ƀă rak vế krá tơniăn Tơnêi têa Việt Nam xah hô̆i chuh ngiah.

VOV Tây Nguyên/Tơplôu: Katarina Nga