VOV4.Xơ Đăng - Kơxê lơ 29/8, a Hà Nội, po Hneăng hôp mâu kăn lâp tơnêi têa Khu lo tŏng veăng Việt Nam rôh má 11, hneăng hơnăm 2022 – 2027, ƀă tơdroăng ki veăng hôp dêi lối 500 ngế cho mâu ngế ki kơhnâ rơkê teăng mâ ăm lối 7,2 rơtuh ngế kăn ƀô̆, hô̆i viên, khu ki pleăng dêi hnoăng cheăng, droh rơtăm Khu lo tŏng veăng tung lâp tơnêi têa. Hneăng hôp Khu lo tŏng veăng Việt Nam rôh má 11 ƀă hên hnoăng cheăng ki kal, tung mê, mơnhên tối hnoăng cheăng Hô̆i ƀă tơdroăng tơ’noăng dêi Khu lo tŏng veăng hneăng hơnăm 2017 – 2022; pơkâ tơdroăng, hnoăng cheăng, tơdroăng ki rơhêng vâ, troăng pơkâ tơmiât ƀă mâu troăng hơlâ pơkâ tơtro vâ mơdêk tung tâi tâng hnoăng cheăng Hô̆i ƀă tơdroăng tơ’noăng Khu lo tŏng veăng tung hneăng hơnăm 2022 – 2027.

Hneăng hơnăm hdrối nah, Khu lo tŏng veăng tung lâp tơnêi têa hiăng đi đo tơmiât rơkê, tơbleăng mâu tơdroăng tơ’noăng, mâu tơdroăng cheăng tŏng kum troh hên ngế tung pơlê pơla, ƀă kơxô̆ liăn lối 23 rơpâu rơtal liăn, tŏng kum rêm hơnăm ăm lối 18 rơtuh ngế. A rôh hôp má môi Hneăng hôp khu kăn lâp tơnêi têa Khu lo tŏng veăng Việt Nam hiăng pôk Khu pơkuâ ngăn Tíu xiâm Khu lo tŏng veăng Việt Nam hneăng 11, hơnăm 2022 – 2027 ƀă tơkŭm po Rôh hôp Khu pơkuâ ngăn Tíu xiâm tơnêi têa Hô̆i hneăng 11 rôh má Môi.

Katarina Nga tơplôu ƀă tơbleăng