Hâi lơ 20/4, Hô̆i đong hnê ngăn kong pơlê Dak Lak tơkŭm po hneăng hôp ‘na tơdroăng kal rôh má 8, hneăng 10, pơla hơnăm 2021 – 2026 vâ séa ngăn, pơkâ mâu tơdroăng ki kal ối tung hnoăng pơkuâ cho ki kal pêi tơdrêng, ki kal vâ pêi pro tro hnoăng cheăng mơnhông cheăng kâ rêh ối pơlê pơla hơnăm 2023 ƀă mâu hơnăm ki pơtối.

A hneăng hôp kố, Hô̆i đong hnê ngăn kong pơlê Dak Lak séa ngăn, pơkâ mâu tơdroăng ki kal ối tung kơvâ liăn ngân, hngêi rak liăn, tơnêi tơníu, ‘no liăn pêi cheăng tơdjuôm, mâu tơdroăng pơkâ dêi tơnêi têa; troăng hơlâ tŏng kum kăn ƀô̆, kong chưk, viên chưk ƀă hên ki ê. Tung mê ki rơhêng vâ tối cho mâu tơdroăng pơkâ xing xoăng liăn ăm tơdroăng cheăng pêi pro mâu tơdroăng pơkâ dêi tơnêi têa hơnăm 2023; Tơdroăng pơkâ kơlo kơxô̆ ‘mâi rơnêu tơnêi xúa a hơnăm 2023 a kong pơlê Dak Lak; Pơkâ ăm phêp pro ton pêi pro ƀă ‘no liăn túa pơkâ ‘no liăn cheăng tơdjuôm hơnăm 2022 troh hơnăm 2023 kơxô̆ liăn kong pơlê; Pơkâ ‘na xing xoăng tơ’nôm liăn kong pơlê ăm tơdroăng tơkêa ‘no liăn bro troăng kân Hồ Chí Minh troăng ví peăng mâ hâi lo pơlê kong kơdrâm Ƀuôn Ma Thuột xua tâk kơxô̆ liăn gu tơbăng tơnêi.