Kơxo hâi lơ 29/12, a Hà Nội, Khu xiâm tơkŭm po tơdroăng tơnêi têa tơkŭm po Hneăng hôp lâp tơnêi têa mơgêi tơdroăng pêi cheăng tôh mơjiâng Đảng hơnăm 2022, pêi pro hnoăng cheăng hơnăm 2023. Pôa Võ Văn Thưởng, Kăn cheăng tung Khu xiâm kal kí, Hnê mơhno má môi Khu pơkuâ hnê ngăn cheăng Đảng veăng ƀă xông tơpui hnê mơhno hneăng hôp.

Tâi tâng hneăng hôp

Xông tơpui a Hneăng hôp, pôa Võ Văn Thưởng pơkâ thế Kơvâ tơkŭm po Mơjiâng Đảng pêi pro tâi tâng, tơdâng tơ’mô Pơkâ Khu xiâm pơkuâ tơdroăng tơnêi têa hneăng má 13, pơtối tơbleăng mơjiâng mâu pơkâ dêi Đảng tơniăn tơdâng tơ’mô, chiâng to. Tối rơdêi pơ’lêh hên tâ mê nếo tung tơdroăng pêi cheăng kăn ƀô̆, tơniăn ôh tá tơdjâk pa kong, hên troăng, ƀă tơmeăm, tơdroăng châ tơƀrê ki nhên, rơtế ƀă ngế krê ƀă khu pú hên, pêi pro tơtro mơnhên kăn ƀô̆ hlối pêi pro ƀă tơdroăng kheăn tối ƀă hvái ngăn dêi tơdroăng tơná pro tá hâi tro ‘ló.