Kơxo lơ 29/12,  pôa Lê Minh Khái, Ngế pro xiâm phŏ hnê ngăn tơnêi têa veăng hôp ƀă tối tơbleăng a hneăng hôp mơgêi 20 hơnăm pêi pro tiô luât pơkâ ăm mung liăn ƀă mâu ngế kơtiê ƀă mâu ngế ai hnoăng tơnêi têa ki ê tiô Pơkâ kơxô̆ 78 dêi Chin phuh. Tối tơbleăng a hneăng hôp, pôa Lê Minh Khái, Ngế pro xiâm phŏ hnê ngăn tơnêi têa tối tung la ngiâ kơchơ, tê mơdró lâp plâi tơnêi rế kơdroh; pêi pro tơmeăm dêi khu mơdró trâm hên xơpá, tơdjâk troh tơdroăng pêi cheăng, pêi lo liăn dêi mơngế pêi cheăng, mơhno ki tơdjâk xua COVID-19 ton hơnăm, kong prâi ôh tá tơniăn, mêi khía mơhot, têa kân lân lu pro, pá vâ ’nâi hdrối ƀă hên ki ê, xua mê tơdroăng pêi pro “Ôh tá lôi ngế ki lâi pá rŏng”  pơkâ tung tơdroăng pêi pro tiô luât pơkâ tŏng kum xăm kơtiê krá tơniăn cho hngăm păng ‘nâng.

Xua mê, Ngế pro xiâm phŏ hnê ngăn tơnêi têa pơkâ thế, Hngêi rak liăn Tơnêi têa Việt Nam hnê mơhno Hngêi rak liăn tŏng kum mâu kơtiê tơkŭm séa ngăn, ‘mâi hơ’lêh, tơ’nôm, pê klêi mâu pơkâ dêi luât; luât pơkâ, luât tŏng kum tơdjâk troh ‘na mung liăn rêh ối pơlê pơla môi tiah mơhnhôk tăng, rak ngăn ƀă xúa tơƀrê kơxô̆ liăn mung kum pơlê pơla mơnhông cheăng kâ.