Kơxo hâi lơ 28/5, a Hà Tĩnh po hneăng  hôp tơbleăng Pơkâ pơla hơnăm 2021-2030, tơdroăng vâ pêi troh hơnăm 2050 ƀă ‘no liăn mơjiâng tơmeăm khoăng dêi  Hà Tĩnh. Pôa Vương Đình Huệ, Kăn xiâm hnê ngăn Kuô̆k hô̆i veăng hôp. Tối tơbleăng a Hneăng hôp, pôa Vương Đình Huệ tối nhên, hneăng hôp cho tơdroăng ki ai pơxúa khât, cho rôh ki vâ pơ-eăng lâp lu ‘na tuăn tơmiât mơnhông mơdêk, hvái ngăn vâ pêi ƀă tơ ‘mot ‘no liăn cheăng, ôh tá xê krê to kong pơlê Hà Tĩnh mê ối tá tâi tâng mâu kong pơlê kơpong Bắc Trung bộ, kơpong kĭng têa kơxĭ tơdế tơnêi têa tối tơdjuôm.

Tung la ngiâ, pôa Vương Đình Huệ pơkâ thế kong pơlê Hà Tĩnh mơnhông tơƀrê ƀă 4 kơvâ cheăng ki kal, 3 kơvâ cheăng ki kal tung kơphô̆, 3 tơdroăng cheăng pakĭng ‘na cheăng kâ ƀă 1 tíu xiâm mơnhông tơmeăm pê lo, mơdêk pêi lĕm tơƀrê ƀă châ tơbriât tê a kơchơ dêi kong pơlê, mơdêk pê lo liăn, mơnhông rêh ối tơmeăm khoăng ƀă tuăn ngôa, vâ kuăn pơlê châ xúa kơxô̆ liăn pê lo mơnhông tơƀrê.