Kơxê lơ 18/5, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i ƀă pôa Phạm Minh Chính, Ngế pro xiâm hnê ngăn tơnêi têa pơkuâ hneăng hôp pơla Đảng đoân Kuô̆k hô̆i ƀă Khu pơkuâ cheăng Đảng Chin phuh ‘na Hneăng hôp má pơtăm, Kuô̆k hô̆i hneăng má XV. Xông tơpui a pơxiâm po hneăng hôp, pôa Vương Đình Huệ tối ăm ‘nâi, a hneăng hôp má 5, Kuô̆k hô̆i kô pêi pro hên tơdroăng cheăng ‘na tơdroăng mơjiâng luât, séa ngăn ƀă pơkâ mâu tơdroăng ki kal.

Mâu tơdroăng xiâm tơpui tối pơrá cho mâu tơdroăng ki pá, tơvâ tơvân, ki má lối cho mâu tơdroăng tơdjâk troh tơnêi tơníu, há yă pro tơmeăm, ‘na yă, hngêi ối ƀă hía hé. Xua mê, tiô Kăn xiâm hnê ngăn Kuô̆k hô̆i, hneăng hôp kố vâ tah lôi tâi tâng mâu tơdroăng ki ối phá dêi pó ƀă kal châ môi tuăn pơla kơ koan tơbleăng ƀă séa ngăn. Tơtrŏng mâu tơdroăng xiâm hrá pơtroh kơ koan séa ngăn ƀă Vi ƀan pơkuâ Kuô̆k hô̆i hiăng tơdjâk troh tơdroăng pêi pro mâu pơkâ pơtối; mâu tơdroăng xiâm ki kal tơbleăng Kuô̆k hô̆i troh nôkố mâu khu xiâm xuân tá hâi môi tuăn troăng tơmiât pêi, Kăn xiâm hnê ngăn Kuô̆k hô̆i pơkâ thế, ƀă mâu tơdroăng kân, pá puât, ối tơpui phá tơ-ê dêi pó mê kơ koan tơbleăng, mâu khu xiâm, kơvâ cheăng thế tơpui tơno nhên, môi tuăn ƀă dêi pó mê nếo mơhnhôk châ Kuô̆k hô̆i vâ môi tuăn.

Ngế pro xiâm hnê ngăn Chin phuh pơkâ thế Kuô̆k hô̆i, Vi ƀan pơkuâ Kuô̆k hô̆i tơmâng troh troăng hơlâ xing xoăng kơlo, xing xoăng hnoăng vâ tah lôi tơdroăng ki pá tung pêi pro. ‘Na peăng Chin phuh, tung la ngiâ, Chin phuh kô mơ-eăm pêi pro xing xoăng râ, xing xoăng hnoăng ƀă thăm pôu râng hnoăng cheăng.