VOV4.Xơ Đăng - Kơxê lơ 3/10, a Hà Nội, Khu xiâm ngăn tê mơdró tơrŭm ƀă Khu mơdró kâ châu Âu a Việt Nam tơkŭm po hôp ƀă khu chêh hlá tơbeăng tối ‘na hneăng hôp mâu kăn xiâm ƀă mơđah tơbleăng um tơmeăm cheăng kâ krúa 2022. Po sap hâi lơ 28-30/11 a Pơlê kong kân Hồ Chí Minh, Hneăng hôp mâu kăn xiâm ƀă  mơđah tơbleăng cheăng kâ krúa 2022 ai pơxúa kal khât tung pêi pro hriăn plĕng tơniăn tơtro ƀă tơdroăng tơhrâ pơla péa pâ Việt Nam ƀă Khu tơrŭm châu Âu, veăng pêi pro mâu tơdroăng Tơnêi têa ‘na mơdêk cheăng kâ krúa Việt Nam.

Mơnhông cheăng kâ krúa kô tơbleăng, mơđah mâu kơmăi kơmok pêi cheăng tiô túa nếo, tơmeăm pêi ki dâi lĕm, ki ‘nâi hriĕn plĕng tơdroăng ki nếo ƀă túa cheăng kâ krúa, cheăng kâ ‘nâ pơ’lêh klêng tê dêi mâu khu mơdró châu Âu ƀă Việt Nam.

Pakĭng mê, mâu Hneăng hôp ƀă Rôh hôp tơpui tơdroăng mơđah tơbleăng um tơmeăm kô cho xiâm ki vâ mơdêk tơrŭm cheăng pơla khu mơdró châu Âu ƀă Việt Nam, veăng mơdêk môi cheăng kâ Việt Nam krúa lĕm, krá tơniăn ing mâu tơdroăng hnê tối hriăn plĕng ki nếo ƀă hnê pơcháu cheăng kơmăi kơmok.

VOV Tây Nguyên/Tơplôu: Gương