Kơxo lơ 4/1 a Hà Nội, Vi ƀan  ngăn Kuăn ngo tơkŭm po hneăng hôp tâi tâng tung lâp tơnêi têa mơgêi tơdroăng cheăng ‘na kuăn ngo hơnăm 2022; mơgêi 1 hơnăm pêi pro tiô Tơdroăng Pơkâ dêi tơnêi têa mơnhông cheăng kâ rêh ối kơpong hdroâng kuăn ngo ƀă kong ngo pơla hơnăm 2021-2030, pơla rôh má 1. Hơnăm 2022, Vi ƀan hnê ngăn Kuăn ngo hiăng tơmâng khât mâu tơdroăng cheăng ki kal châ pơcháu, tơbleăng pêi kơtăng, tơdâng, ai pơxúa tơ ƀrê mâu tơdroăng, luât pơkâ ‘na kuăn ngo, veăng ‘no hnoăng tơmâng khât troh tơdroăng rêh ối cheăng kâ - pơlê pơla ăm hdroâng kuăn ngo ƀă kong ngo.

Tung hơnăm 2023, Vi ƀan hnê ngăn Kuăn ngo pơtối tơbleăng mâu tơdroăng cheăng ki kal, tung mê ai tơkŭm pêi tro tâ nếo Tơdroăng pơkâ dêi tơnêi têa ‘na mơnhông cheăng kâ - rêh ối kơpong hdroâng kuăn ngo ƀă kong ngo pơla hơnăm 2021-2030, pơla rôh má 1: Sap hơnăm 2021 troh hơnăm 2025.

Pôa Hầu A Lềnh, Ngế xiâm, Ngế pơkuâ xiâm Vi ƀan Kuăn ngo ăm ‘nâi, tung mâu hơnăm hdrối, Chin phuh hiăng ai hên luât pơkâ vâ mơnhông cheăng kâ kơpong hdroâng kuăn ngo ƀă kong ngo, tung mê, ki xiâm cho ‘na kơvâ pêi chiâk. Kố xuân cho mâu pơkâ, tơdroăng cheăng pêi ki Vi ƀan kô pêi tung la ngiâ.